BYD Da Han флагман седанының тұсаукесері жақында өтеді

BYD Da Han-ның тұсаукесері тамызда Чэнду автосалоны аясында өтеді. Бұған дейін модельдің техникалық сипаттамасы туралы ақпарат тарады, енді өндіруші қара-жасыл түсті жаңа көліктің ресми суреттерімен бірге қосымша мәлімет жариялады.

Автомобиль Dynasty топтамасының флагманы болады және электромобиль әрі қуатталатын гибрид ретінде шығады. Толық электрлі Da Han-ның базалық комплектациясы 102.3 кВт·сағ литий-темір-фосфатты аккумулятормен жабдықталады. Батареяның салмағы 726 кг болғанымен, қуаттаусыз 1008 шақырым (CLTC) еңсеруге мүмкіндік береді.

Артқы осьтегі бір электромоторы бар базалық нұсқаның қуаты 496 ат күшіне тең. Екі мотор және толық жетек жүйесі бар үздік түрленім 764 ат күшін береді, бірақ оның жүріс қоры 880 шақырымға жетеді деп хабарлады CarNewsChina.

Гибрид 268 ат күшіне ие тартқыш электрлі агрегат және 154 ат күшін беретін 1.5 литрлік турбомотормен жүреді. Іштен жанатын қозғалтқыш тек аккумуляторды қуаттамайды, жоғары жылдамдықта алдыңғы дөңгелектерді айналдырады. 54.4 кВт·сағ литий-темір-фосфатты батареяның арқасында бензоэлектрлі Da Han дәстүрлі моторды қоспай 470 шақырым жүріп өте алады.

Da Han жартылай жасырын есік тұтқасы, 21 дюймдік көпшабақты дискі және артқы жағындағы тұтас шаммен ерекшеленеді. DiPilot 5.0 автопилоты бар жүргізуші ассистенттерінің кешені шатырдағы лидардан, 5 миллиметрлік радардан, 12 ультрадыбыстық радардан және 11 сыртқы камерадан ақпарат жинайды. Бұл кешен тек жүргенде емес, көлік тұрақта тұрғанда да айналасындағы жағдайды үздіксіз бақылап отырады.

Қытайдағы BYD Da Han-ның бағасы 210–230 мың юань (~14.8—16.2 млн теңге) аралығында болады деген болжам бар.