BYD Great Han-ның суреті желіде тарады

Біраз уақыт бұрын BYD концерні камуфляжбен қапталған болашақ флагманының алғашқы суреттерін көрсетті. Ол Great Han деп аталады. Бірақ компания құпия сақтай алмады. Қытай өнеркәсіп министрлігі модельге сертификат рәсімдегенде суреттері мен техникалық сипаттамасын жария етті.

1 / 3

• 
• 
• 

1 / 3

Суреттерден машинаның дизайны Han L-ге ұқсайтынын көруге болады, бірақ одан үлкен екені анық. Флагманның ұзындығы — 5.3 метр, Han L-дікі — 5.05 метр. Great Han-ның дөңгелек базасы 16 см ұзарып, 3.13 метрге жетті. Жаңа өнім стандарт Mercedes-Benz S-Class-тан ұзын.

Great Han электрлі және гибрид күштік құрылым алады. Базалық батареялы нұсқа артқы осьтегі 500 ат күшін беретін бір электромотормен және сыйымдылығы әзірге белгісіз LFP аккумуляторымен жабдықталады. Құжатта мұндай көліктің жүріс қоры 1008 шақырымға жетеді деп жазылған. Екі электрлі қозғалтқышы бар толық жетекті модификацияның қуаты 775 а.к. Ол 880 км еңсереді.

Қосылатын гибрид жүйе 156 ат күшіне ие 1.5 литрлік бензинді агрегат, 271 ат күшін беретін электромотор және LFP аккумуляторынан тұрады. Жалпы жүріс қоры әзірге белгісіз, бірақ тек электр қуатымен 370 км жүреді.

Great Han айтарлықтай ауыр. Салмағы — 2.2–2.5 тонна. Жабдықтар тізімі туралы толық ақпарат жоқ. Дегенмен автомобиль Great Tang кроссоверінен толық басқарылатын шасси және екі камералы пневматикалық тірегі бар бейімделгіш DiSus-A аспасын алуы мүмкін.