1990 жылдардың басында Volkswagen Group концерні Bugatti-ді сатып алған соң Женевадағы автосалонда Джорджетто Джуджаро қаламынан туған жаңа модельдің прототипін көрсетті. Төрт есікті EB 112 алдыңғы буындағы Type 57 SC Atlantic, Bugatti Royale, Tipo 55 пен Tipo 32-ге тән қасиеттерді бойына жинаған.
Сол кезде Bugatti-ге иелік еткен Романо Артиоли су жаңа темір тұлпар EB 110-нан жақсы тізгінделетінін айтқан еді. Капот астындағы 456 күш беретін 6 литрлік V12 механикамен жұптасып, машинаның алғашқы жүздікті 4.3 секундта алуына жағдай жасайды.
Өкінішке орай, көліктің мүмкіндігін ешкім тексере алмады. Өйткені модель сериялы өндіріске шыққан жоқ. Екінші прототип әзірленіп жатқанда компания банкрот деп танылған. Дегенмен дәл осы көлік жуырда сатуға қойылды. Әлемде EB 112-нің әр жерде құрастырылған үш данасы ғана бар екен.
Сатылымға шыққан 39002 нөмірлі прототип жайлы ақпарат жоқтың қасы. Оны Chevalley компаниясы Швейцариядағы импорттаушыға жеткізген. Көлікке осы уақытқа дейін бір адам иелік еткен, ол 3900 км жол жүріпті. Бағасын тек сұраныс жіберу арқылы білуге болады, бірақ оның кем дегенде алты саннан тұратыны анық.
Комментариев: 0