Бүгінде V12-нің дәуірі аяқталуға жақын қалды десе болады. Үлкен моторлардан Mercedes-Benz бас тартты, BMW да 12 цилиндрлі «жетілікпен» қош айтысатынын тұспалдаған болатын. Алайда бавариялықтар бір кездері жетінші сериялы седан қақпағының астына V16 моторын орнатуды жоспарлап еді. Оған қоса, инженерлер оның «Алтын балық» деп аталатын прототипін де құрастырған болатын.
E32 шанағындағы көлік бұл атауға тек айрықша бояуы үшін ғана емес, қанатындағы желбезектердің арқасында ие болды. Олардың керегі не? Мұның жауабы қарапайым: 16 цилиндрлі агрегат тым үлкен болғандықтан, қақпақ астында радиатор қоятын орын қалмады. Содан инженерлер көп бас қатырмай, салқындату жүйесін жүк салғышқа қою жөнінде шешім қабылдайды. Артқы шамдардың арасындағы темір тор да соның бір бөлшегі. Ол ыстық ауаны шығару үшін қажет.
Іс жүзінде мотордың өзі M70-тің жетілдірілген нұсқасы болып табылады. 5 литрлік V12-ні негізге алған инженерлер оған төрт цилиндр қосқан. Сөйтіп агрегаттың көлемі 6.65 литрге дейін, ал қуаттылығы 300-ден 408 күшке дейін артты. Күш моментінің барлық 625 Нм-ін мотор артқы дөңгелектерге механикалық қорап арқылы береді.
«Алтын балық» 100-ге дейін алты секундта жылдамдық алады, прототиптің ең жоғарғы жылдамдығы сағатына 282 шақырымды құрайды.
Жобаның әлеуеті жоғары болғанымен, ол жарыққа шықпады. BMW компаниясының басшылығы «жетілік» үшін 5 литрлік V12 жеткілікті деп ұйғарған.
Комментариев: 0