2021 жылдың көбі кетіп азы қалды, бұл уақытта жанармай бекеттеріндегі бағаның кәдімгідей өзгергенін аңғару қиын емес. Қаңтарда 5000 теңгеге 33 литрге жуық АИ-92 алуға болатын еді, ал тамыздың басында бұл ақшаға 29 литр ғана бензин құясыз. Сұранысы жоғары отынның орташа бағасы 149.7-ден 172 теңгеге көтерілді. Кейбір бекеттерде одан қымбат. Мысалы, ірі желілер сәуірде АИ-92-ні 163-168 теңгеден сатып жатқанда, елдің солтүстік аймағындағы кәсіпкерлер оны 179 теңгеден саудалады.
АИ-92-нің бағасы көктемде шарықтады. Ақпанның соңғы күндері оның бір литрі 152.7 теңге тұратын, наурыздың аяғында 157.7 теңгеге жетті, ал сәуірдің орта тұсында ол үшін 164.5 теңге сұрала бастады. Жазда өсім сәл бәсеңсіп, темір тұлпардың азығы 2 теңгеге қымбаттады.
АИ-95 те шетте қалмай, мамыр мен тамыз аралығында 6 теңге өсім көрсетті. Кейбір бекеттерде сұйық отын 200 теңгеден жоғары бағада сатылып жатыр. Helios пен Royal Petrol-да көлікке 95-бензин құям десеңіз, литріне 204 және 205 теңге төлейсіз.
Дизельді отынның да қымбаттағаны байқалады. Жыл басталғалы оның құны 8.6 %-ға артты. Мамырдың аяғында солярка 188 теңге тұратын, маусымның ортасына қарай 198.8 теңгеден саудалана бастады.
Оңтүстіктегі жүргізушілер дизель тапшылығын сезінді. Бекеттердің көбі оны сатудан мүлде бас тартса, қалғаны лимитпен берді. Оны 230-250 теңгеге ұсынған пысық кәсіпкерлер де табылды.
Шенділер мұндай келеңсіздікке мұнай өңдейтін зауытта жөндеу жүргізілуі мен Атырау мен Павлодардан дизель жеткізуде қиындық туындауы себеп болғанын айтты.
Шілдеде тапшылықтың беті қайтып, жаға ұстататын баға байқалмаса да, нарық бұрынғы қалпына келмеді. Бірен-саран бекеттерде дизельдің құны әлі де 200 теңгеден қымбат. Дегенмен басым бөлігі қазір 195-198-ден сатып жатыр.
Бағаның уақытша төмендеуіне Бәсекелестікті қорғау және дамыту агенттігінің жанар-жағармай сатушыларға жіті назар аударғаны ықпал етуі мүмкін. Агенттік өкілдері өзара келісім белгілерін анықтап, мұны бағаны түсіру арқылы жоюды талап етті.
Бірақ саударгерлерге отын бағасын бір апта өтісімен қайта көтеріп алуға ешкім тыйым салмаған сияқты. 22 шілде мен 10 тамыз аралығында ірі желілердің көбі отын құнын өзгертті. Енді дизельдің орташа бағасы 199 теңгені құрайды. Royal Petrol мен «Газпромда» дизель 200-201 теңгеден сатылып жатыр.
Комментариев: 0