Биыл электромобильге сұраныс артты

RHO Motion зерттеу компаниясының дерегінше биыл 7 айда жалпы 10.7 млн машина сатылған, бұл былтырғы сол кезеңмен салыстырғанда 27 % көп.

Оның үштен екісін, яғни 6.5 млн машинаны жер бетіндегі ең ірі нарық саналатын Қытайдың тұрғындары алыпты. Бір жыл ішіндегі өсім 29 %-ға жетті.

Электромобиль сегменті үшін маңызды тағы бір нарық — Еуропа, қарт құрлықтағы дилерлер 2.3 млн техниканың кілтін тапсырған, бұл былтырғыдан 30 % жоғары нәтиже. Сауданың қызуына Renault 4 E-Tech сияқты субкомпакт класындағы көліктер ықпал етті.

Солтүстік Америкада жағдай мүлде басқа, мұнда небәрі 1 млн EV өтті (2 %). Халықтың батареялы көлікке қызықпауына АҚШ президентінің саясаты әсер етті, бұл елде билік ауысқалы жанармаймен жүретін техникаға айыппұл салу туралы ереже күшін жойды және электрокар иелеріне жеңілдік жасалмайды.

Жер бетінің қалған бөлігінде 0.9 млн электромобиль саудаланған (+ 42 %).

RHO Motion аймақтар арасындағы айырмашылыққа қарамастан, электромобильді жаппай қолданысқа енгізу процесі 2025 жылы жақсы жалғасын тапты деп жазды.