21 қаңтарда Экология министрлігі, ИИДМ, отандық автоөндірушілер, автодилерлер, қоғамдық және экологиялық ұйымдар мен бірлестік өкілдері автокөлік пен ауыл шаруашылығы техникасын елге кіргізген кезде төленетін утилизациялық алым тағдырын талқылауға кірісті.
Жиналыста қызу талқы жүріп, түрлі ұсыныс айтылды. Сөз сөйлегендер жиналған ақшаны қазақстандық автоөндірісті қолдауға емес, утилизацияға ғана жұмсап, алым мөлшерін төмендетуді, тіпті одан толығымен бас тартуды, сонымен қатар жүрілген көліктерді алғашқы тіркеу сомасын алып тастауды ұсынды.
Жиналыста экологиялық мәселе көп талқыланған жоқ, өйткені утильдік алымға қарсылар мен оны жақтаушылар (негізінен автоөнеркәсіп өкілдері) көбірек пікір білдірді.
Ауыл шаруашылығы техникасы жайлы да пікір қайшылығы байқалды. Шаруалар шетелден техника мен комбайн әкелгенде алым төлемеуді ұсынса, жергілікті құрастырушылар мен сатушылар бұл идеяға қарсы шықты. Импорттаушылардың бәрі утилизациялық алымды қолдап отырған жоқ: әсіресе машинаның санатын анықтауда бірізділік болмай, бір жылдан бері тартысып жүрген рекреациялық және арнайы техника кіргізетін компаниялар бұған үзілді-кесілді қарсы.
Жиналғандар бүгін бірауызды шешімге келе алмады. Экология министрлігі президент алым мөлшерін тез арада қайта қарауды тапсырғанын және келесі отырыс 25 қаңтарда өтетінін мәлімдеді. Ол отырыста бүгінгідей көп адам болмайды. Қазірге дейін спикерлер ұсынған барлық баяндама мен мүдделі тараптардың жазбаша ұсынысы жинап алынады.
Kolesa.kz жұмыс барысы қалай жүріп жатқанын бақылап, оқырман назарына ұсынып отырады.
Комментариев: 0