26 қаңтарда утиль алымы мәселесі тағы талқыға түсті. Жиналысқа қатысқандардың көбі импорттаушылар мен автоөндірушілерден утиль алымын жинауды жарты жылдан бір жылға дейін тоқтатуды қолдады. Мораторий жарияланған кезеңде тариф мөлшерін нақтылап, утилизацияға қанша ақша керек екенін есептеу ұсынылды.
Жаңа төлем бекітілген соң мораторий кезінде көлік әкеліп, есепке қойғандардың мәселесі қалай шешіледі? Бұған қатысты ештеңе айтылмады, дегенмен оны шешудің екі жолы бар: утиль алымын мүлде сұрамау немесе кейін төлеуге міндеттеу.
Келесі тым жиі айтылған ұсыныс — алым сомасын 100 000 теңге мөлшерінде бекіту. Неге дәл 100 мың екенін анықтап жатқан ешкім болмады. Оған қоса үш жастан асқан машинаны бастапқы тіркегенде де дәл осындай ақша талап етуді жөн санайтындар табылды. Қазір көлікті бірінші рет тіркегенде 1 531 500 теңге сұралады.
Айтпақшы, утиль алымына қоғамдық ұйымдар ғана емес, көлік импорттаушылар да қарсы пікір білдірді. Солардың бірі алым көлемін 10 АҚШ доллары, яғни 4352 теңге көлемінде бекіту қажет дейді. Бұл шара халықтың жаңа машина мінуіне мүмкіндік береді.
Жүк көліктері мен автобус мәселесі де өзекті. Тасымалдаушылардың өкілдері техниканы уақытылы жаңартуға көп адамның шамасы келе бермейтінін айтты. Нәтижесінде қазір логистика нарығын Ресей мен Беларусьтің жүк тасушылары жаулаған. Автобусқа келер болсақ, өңірлердегі қала көшелерінен жаңа қоғамдық көлік көрмейсіз.
Бұл мәселе Алматыдағы автобус парктеріне де қатысты. Келісім бойынша олар жыл сайын бар көлігінің 20 %-ын жаңартуға тиіс. Бірақ жеке компанияларға бұл міндетті орындау оңай емес.
Қалааралық бағытта да талай жөндеуден өткен ескі автобустар жүр.
ИИДМ өкілі министрлік ершікті тартқыштар үшін сұралатын утиль алымын біршама төмендетуге дайын екенін атап өтті. Кәсіпкерлердің ұсынысы қаралып жатыр. Шенділер жолаушы тасымалдайтындардың да мәселесін назардан тыс қалдырмайды.
Нақты қадамдар жасалды ма?
Иә. Кездесу барысында экология, геология және табиғи ресурстар министрі Серікқали Брекешев қарда жүретін көлік, квадроцикл және сол секілді рекреациялық техника үшін сұралатын утиль алымының күшін жоюға уәде берді. Өткен кездесуде импорттаушы көлік типі сәйкес келмесе де аталған техникаға автомобильмен бірдей алым сұралатынын айтқан еді. Осы мәселені шешуге бағытталған бұйрық дайын, жуырда талқыланады.
Утилизация алымын жақтағандар Қазақстанның автопаркі ескіріп барады дегенді мойындамай отыр. Олар утилизациялық алымнан бас тарту автомобиль саласын құрдымға кетіріп, нарықтың шеттен заңсыз жолмен келген машиналарға толуына әкеледі дейді.
Утилизациялық алым елге ескі машина мен өткен өмірі күмәнді көліктердің кіруінен қорғай бермейтінін айта кеткен жөн, соның жарқын дәлелі — Ресейде тіркелген машиналар. Былтыр елімізде 200 мыңнан аса ресейлік авто жүргені анықталған еді.
Жиналыста импорттаушылар мен автоөндірушілерден алым жинауды жалғастырып, өзі міну үшін шетелден көлік әкелетін жеке тұлғаларды алымнан босату туралы да ұсыныс айтылды.
Бұл диалог алдыңғы жиналысқа қарағанда әлдеқайда ойға қонымды болғанын атап өткіміз келеді. Мұндай кездесу тағы бірнеше рет болады. Kolesa.kz редакциясы жағдайды бақылауда ұстап, оқырмандарға ақпарат беруді жалғастырады.
Комментариев: 0