Билік үш осьті жүк көлігіне тыйым сала ма?

Болатбек Нажметдинұлы бір топ мәжілісменнің атынан ҚР премьер-министріне депутаттық сауал жолдады. Ол халық қалаулылары Құрылыс кодексі жобасын әзірлеген кезде «Автомобиль көлігі туралы» заңның 38-2-бабын алып тастау жөнінде түзету енгізгенін айтты. Бұл бап бойынша 2026 жылғы 1 қаңтардан бастап салмағы 25 тоннадан асатын, жүкті өзі түсіретін үш осьті көлік жолға шыға алмайды.

«Заңнамалық жұмысқа қарамастан, норманың күшіне енуіне аз уақыт қалды, оның әлеуметтік-экономикалық салдары ауыр болуы мүмкін. Ол құрылыс, жол жөндеу, қоқыс пен қар шығару, энергетикалық инфрақұрылым, су мен газ жүйесі, жер қойнауын пайдалану және ТЖМ саласында жұмыс істейтін шамамен 36 500 жүк көлігін қамтиды. Астық, мақта, тыңайтқыш, жем және өзге өнімдерді тасымалдайтын мыңдаған фермердің жұмысына да тосқауыл болады», — деді депутат.

Б. Нажметдинұлы көптеген тасымалдаушы 2026 жылдан бастап жұмысы тоқтап қалуы мүмкін екенін әлі білмейді деді.

Депутат үш осьті шасси бетон араластырғыш, контейнер тасығыш, астық тасығыш, тіпті кей автобуста бар екенін айтты. Бірақ тек жүкті өзі түсіретін көлікке тыйым салынып отыр, ал олар елге кірерде және тіркелгенге дейін жалпы жолда пайдалануға рұқсат беретін сертификат алған.

Мәжілісмен мұндай машинаның көбі лизинг немесе несиеге алынғанын атап өтті. Заң күшіне енсе, жүк көлік иелері табысынан айырылып, қарызға батады. Бұл жүз мыңдаған адамға қатысты, сондықтан әлеуметтік наразылық туындауы ықтимал.

Депутат мәселені шешу үшін 2026 жылғы 1 қаңтарға дейін «Автомобиль көлігі туралы» Заңның 38-2-бабын ішкі нормативтік актімен уақытша тоқтатуды ұсынды.