Депутаттар автомобильді үш жылда бір рет техникалық тексерістен өткізуді ұсынды

«Аманат» партиясының депутаттары премьер-министрдің бірінші орынбасары Роман Склярға сауал жолдап, міндетті техникалық тексеріс мерзімін өзгертуді ұсынды. Олардың сөзінше жыл сайынғы техбайқау әлдеқашан формаль рәсімге айналған, ол жол қауіпсіздігіне еш әсер етпейді.

ҚР ІІМ биыл Қазақстанда 12 мың жол апаты тіркелгенін хабарлады, оның тек төртеуі автомобильдегі техникалық ақау салдарынан болған. Ал 2024 жылғы 31 мың жол апатының 17-сіне ғана машинадағы кемшілік себеп болыпты.

Депутаттар жол апатына негізінен жүргізушілердің ереже бұзуы мен сапасыз жол ықпал етеді деп санайды.

Қазір елде 6.2 млн автомобиль бар, оның 4.9 миллионы техбайқаудан өтуге міндетті екен. 2024 жылы 3.5 млн машина тексерістен өтсе, биыл бірінші тоқсанда мамандар 1.5 млн көлікті тексерді. Қызмет құны орташа 5 мың теңге десек, операторлардың жылдық табысы шамамен 17 млрд теңге болған. Арасында техбайқау барысында заң бұзатындары аз емес. Былтыр техникалық қызмет көрсететін орындардың 283 заңсыз әрекеті анықталып, қызметкерлерге 8 млн теңге айыппұл салынды. Ал биыл полицейлер тағы 105 хаттама толтырып, 2.6 млн теңге айыппұл салды.

«Бұл жүйенің ашық емес әрі тұрғындардың мүддесі үшін жұмыс істемейтінін растайды. Миллиондаған азамат іс жүзінде мөрі бар қағаз үшін ақы төлеуге мәжбүр. Оның үстіне алыс ауылда тұратын кісілер техникалық байқаудан өту үшін жүздеген шақырым жол жүріп, әуреге түседі», — деді депутаттар.

Мәжілісмендер коммерциялық мақсатта қолданылмайтын жеке автомобильді үш жылда бір рет тексеріп тұруды ұсынды. Ал жауапты орталықтарды құқық қорғау органдары қайта тексеріп, лицензиясын қайта растауы қажет.

Техникалық тексеріс дұрыс өтпейтініне байланысты одан бас тарту туралы ұсыныс бұған дейін де талай айтылған. Бірақ министрліктер мұндай құжаттың қажет екенін алға тартып, тәртіпті күшейтіп, техбайқауды шынайы өткізуге уәде берді. Алайда әлі ештеңе өзгерген жоқ.