ҚР Ұлттық экономика министрлігі «Салық және бюджетке төленетін басқа да міндетті төлемдер туралы» Қазақстан Республикасы Кодексінің жобасына консультативті құжат әзірледі. Құжат авторлары қозғалтқыш көлемі үлкен автомобильдерден басқа көліктерді салықтан босатуды ұсынып отыр.
Жобаны әзірлеушілер 2025 жылы ЕЭО елдері мұнай өнімдерінің бірыңғай нарығына көшкен соң жанармай бағасы айтарлықтай өсетінін айтты. Нәтижесінде жеке тұлғаның жеңіл автомобиль пайдалану шығыны (көлік салығы, утиль алымы, алғашқы тіркеу ақысы) көбейеді.
«Жанармай бағасы айтарлықтай өссе (мысалы, екі есе), азаматтардың машина алу және пайдалану шығыны артады. Бұл әсіресе эконом класты көлік иелеріне қатты әсер етеді. Сол үшін олардың әлеуметтік және қаржылық жағдайын қиындайтпайтын жол табу қажет», — деп мәлімдеді министрлік.
Құжат жобасына сүйенсек, шенділер қозғалтқыш көлемі үлкен барлық машинаны сәнді тауар қатарына қосқалы отыр, олар кейінгі кезде қозғалтқыш көлемі кіші, бірақ өте қымбат жаңа автомобильдер шығып жатқанын ескермейді. Қазір Қазақстанда шыққанына 20–30 жыл болған моторы үлкен ескі машиналар қаптап жүр, оларды сәнді тауар, ал иесін бай деуге келмейді.
Бұған дейін көлік салығын жанармай құнына қосу туралы бірнеше рет айтылған. Бірақ экономика министрлігі мұндай шешім кей көлік иесіне әділетсіз болатынын айтып, бұл идеяны қолдамады.
Шенеуніктердің жаңа идеясы дұрыс деп ойлайсыз ба?
Комментариев: 0