Tesla ұзақ жүретін көліктер тізіміне енді

Америкадағы iSeeCars консалтинг компаниясы әлдеқайда ұзақ қызмет ететін машиналардың тізімін жасады. Ауқымды зерттеу процесі 2005 жылға дейін он жылдан аса конвейерден кетпеген 174 миллион автомобильді қамтыды.

Мамандар техниканың 250 мың мильді (400 мың км) еш сынбай еңсеру мүмкіндігін пайызбен бағалады. Олар бүкіл мәліметті ұсталған машинаны сату туралы хабарландыру, тіркеу базалары және машинаның тарихына қатысты есеп сияқты бірқатар дереккөзден алыпты.

Компания өкілдері автоиндустрияның аталған межеге жетудегі орташа деңгейі 4.8 % деп мәлімдеді, бұл өміршең техника әзірлеу қаншалықты қиын екенін аңғартады.

Бірінші орынды Toyota алды. Марканың өз көрсеткіші 17.8 %-ға, ал үлестес Lexus-тікі 12.8 %-ға жеткен. Модельдер қатарында Toyota Sequoia (39.1 %), Toyota Highlander-дің гибрид нұсқасы (31.0 %), Toyota Tundra (30 %), ал жеңіл көліктерден Lexus IS (27.5 %) пен Toyota Avalon (18.9 %) үздік атанды.

Toyota-ның ізін ала Honda (10.8 %; Ridgeline, Pilot, Odyssey) мен оған тиесілі Acura (7.2 %) келеді. Соңғысы премиум брендтер ішінде Lexus-ке ғана жол беріп, екінші жүлдені еншіледі.

Бесінші сатыға GMC-дің (4.6 %) рамалы пикаптары мен жол талғамайтын автомобильдері орналасты. Онымен қатар тұрған Tesla-ның (4.6 %) ең үздік өнімі — Model S. Машина 13 орынға тұрақтады.

Тек электромобиль шығаратын компанияның осы санатқа кіруі таңғаларлық жайт емес. Электрлі техниканың аз ғана қозғалғыш элементтен тұратын құрылымы беріктігін арттырады, бірақ 400 мың шақырымды еш бүлінбей артта қалдыруы екіталай, себебі электроникасы өте күрделі.

Зерттеу нәтижесі қымбат көлік мінгендердің көңіліне қаяу салатын шығар. Porsche, BMW, Audi және Land Rover-дің тек 1 %-ы межені бағындырса, Jaguar мен Maserati оған мүлде жетпеген, яғни көрсеткіші нөлге тең.