Бензин мен дизельдің шекті бағасы ұзақ уақыт сақталуы мүмкін

Биыл 10 қаңтарда № 361 бұйрыққа өзгеріс еніп, елімізде жанармайдың шекті бағасы белгіленді. Бастапқыда 180 күнге жарамды болған құжат кейін дәл сондай мерзімге ұзартылды. Қыркүйекте 361-бұйрыққа тағы түзету еніп, жанармай бекеттерін дизельді Қазақстан азаматына 230–260 теңгеден (Тәулігіне жеңіл машинаға 100 литр, жүк көлігі мен қоғамдық көлікке 300 литр), ал шетелдіктерге 450 теңгеден сатуға міндеттеді.

Сондай-ақ бекеттер Аи-80 маркалы бензиннің (егер бар болса) литрін 89 теңгеден, ал 92 және 93-бензинді Қостанай мен Солтүстік Қазақстан облысында 187 теңгеден сатуға міндетті. Ал Астана, Алматы және Шымкент қаласында, Ақмола, Ақтөбе, Шығыс Қазақстан, Батыс Қазақстан, Алматы, Атырау, Жамбыл, Қарағанды, Қызылорда, Павлодар, Түркістан, Маңғыстау, Абай, Жетісу, Ұлытау облысында мұндай жанармайдың бағасы — 182 теңге.

Энергетика министрлігі «Бағасына мемлекеттік реттеу белгіленген мұнай өнімдерінің тізімін бекіту туралы» № 183 бұйрыққа түзету дайындады, ол № 361 бұйрықтың қосымшасы саналады әрі «2023 жылғы 10 қаңтардан бастап күшіне енеді» деп қана жазылған. Құжаттың қашанға дейін жарамды болатыны жазылмапты, демек оның мерзіміне шектеу жоқ. Соған қарағанда жақында негізгі 361-бұйрық та мерзімсіз болуы мүмкін.

Түзету жобасына түсіндірмеде бұл құжат «ҚР экономикалық мүддесін қорғау, соның ішінде мұнай өнімдерін заңсыз өндіру және сатудың алдын алу» мақсатында дайындалғаны жазылыпты.

Бұған дейін Энергетика министрлігі елімізде жанармай тым арзан екенін, сондықтан шетелге кетіп жатқанын айтқан еді.