Тәркіленген мүлікті сататын БЭСА-да (ЕЭТП) мынадай хабарландыру жарияланды: жеке сот орындаушысы «Азия Авто» АҚ автокөлік құрастыру зауытының жалпы ауданы 3448 шаршы метр болатын ғимараттар кешенін (төрт қабатты әкімшілік-өндірістік корпус пен әкімшілік ғимарат) аукцион арқылы сатады. Нысан Өскемен қаласы, Бажов көшесі 101/1 мекенжайында орналасқан.
Бастапқы бағасы — 5 331 490 297 теңге (қазіргі бағаммен 12 млн АҚШ доллары).
Электронды аукцион биыл 4 мамырда сағат 10:00-де өтеді. Бұрын кәсіпорынға тиесілі болған бірнеше жер телімі де сол күні сатылады.
Аукцион өткізу туралы хабарламаға қоса берілген атқару парағында олар компания мен оның бұрынғы басшысы Анатолий Балушкиннен Jýsan Bank-пен жасалған несие келісімі бойынша қарызды өндіріп алуды көздеп отырғанын жазыпты. Қазір 60 млрд теңгеден аса ақша жиналды.
Айта кетейік, 2020 жылы қарашада ҚР ИИДМ «Азия Автоны» келісімге сай міндеттерін орындамады деп айыптап, сот арқылы мемлекетке 174 млрд теңгеге жуық шығынды өтеуді талап еткен. Ал компания басшылығы зауыт жабылуы мүмкін екенін мәлімдеді. Былтыр көктемде зауыт шынымен жабылып, Қазақстанның 19 қаласында 4 мың қызметкер жұмыссыз қалды. 2021 жылы жазда «Азия Авто» АҚ және «Бипэк Авто Қазақстан» АҚ компанияларының бақылаушы акционері Анатолий Балушкин елден кеткен соң көп ұзамай оған іздеу жарияланды. ҚР Қаржы мониторингі агенттігі кәсіпкер аса ірі көлемде алаяқтық жасады деген күдікке ілінгенін айтады. 2021 жылы қыркүйекте «Азия Автоның» жаңадан тағайындалған басшысы Антон Ненахов өзіне қол жұмсағаны белгілі болды. Балушкин Ресей азаматы болғандықтан, Ресей Бас прокуратурасы оны Қазақстан сотына бермей отыр.
Комментариев: 0