Екі жыл бұрын Ескі көліктерді қабылдау бағдарламасы іске қосылған болатын. Осы уақыт аралығында 83 268 автокөлік өткізіліп, «ӨКМ Операторы» ЖШС-і ел азаматтарына 9 млрд 438 млн 672 мың теңге көлемінде қаражат төлеген. Ескі көліктерді өткізуден алдына жан салмаған Шымкент тұрғындары көрінеді, мұнда 12 390 дана техника өткізіліпті. Қабылдаушылардың айтуынша, көбіне 25-тен 30 жасқа дейінгі көліктер қайта өңдеуге жіберіледі екен. 1946 жылғы «Москвич-400» бұлардың ішіндегі ең көнесі болса, ал ең жаңасы — 2014 жылы шығарылған Lada Granta.
Бағдарлама шарттарына сәйкес, өткізілген жеңіл көліктер үшін иелері екі түрлі өтемақы ала алады:
- толық жиынтық үшін 150 мың теңге,
- толық емес жиынтық үшін 48 мың теңге.
Сонымен қатар, 2017 жылдың 26 маусымынан бастап Қазақстанда Жеңілдік сертификаттарын беру бағдарламасы жұмыс істей бастады. Ол бойынша тапсырылған ескі көліктің орнына иелері қазақстанда құрастырылған жаңа темір тұлпарды сатып алуға берілетін сертификатқа қол жеткізе алады. Жеңілдік көлемі өңдеуге жіберілетін көліктің санатына байланысты 315 мыңнан 650 мыңға дейінгі аралықты қамтиды.
Дәл осы 2017 жылы Қарағанды облысында қолданыстан шыққан көлік құралдарын қайта өңдейтін зауыт ашылған болатын. Ол іске қосылған бір жыл ішінде 57 785 көлік жойылыпты.
Осы жазда Kolesa.kz редакциялық тәжірибе өткізген еді: 150 мыңға шаршап қалған Hyundai Avante көлігін сатып алып, мемлекеттік бағдарлама бойынша қайта өңдейтін зауытқа тапсырған болатын. Мұның барлығы видеоға түсіріліп (сатып алғаннан шредерге түсіргенге дейін), қызықты саяхаттың екі бөлімнен тұратын бейнежазбасы шыққан.
Комментариев: 0