Көлік министрі Марат Қарабаев Алматы тұрғындарымен кездесуде жолақтың еніне қатысты стандартты өзгерту жоспары туралы айтты.
— Адамдар веложолақ көп болғанын қалайды, бірақ қазір біздің ұсынысымызға сәйкес жолдың ені 3.5 метр болуы керек. Халықаралық тәжірибе бойынша жолақ енін 2.9 м-ге дейін қысқартып, қалған 0.6 м-ді веложолаққа қалдыру мәселесі көтерілді. Яғни, стандартты өзгерту керек. Қазір жұмыс жүріп жатыр, біз халықаралық тәжірибені зерделедік, оның тиімді екеніне көзіміз жетті, бұл ұсыныспен келісіп, жақында мемлекеттік стандартқа өзгеріс енгіземіз, — деп уәде берді министр.
Бұл мәселе машина көп жүретін Алматы үшін өте өзекті. Мысалы, Әл-Фараби даңғылында автомобильдер үш қатардың орнына жолақтағыдай төрт және одан көп қатарға тізіліп тұрады. Жолақтардың енін қысқартса, жақында іске қосылатын автобус жолағына да, басқа көліктерге де орын қалады. Нәтижесінде қозғалыс реттеледі және тығыз әрі тиімді болады.
Автобус жолағы туралы айта кетсек, оңтүстік астанадағы халықпен кездесуде М. Қарабаев министрлікке арнайы жолақта басқа көліктің жүруіне рұқсат беруді сұрап, өтініштер түсіп жатқанын атап өтті.
— Қазір Алматыда осы мүмкіндік пилоттық режимде тексерістен өтіп жатыр. Эксперимент жыл аяғында бітеді. Нәтижеге қарап, түбегейлі шешім қабылдаймыз. Қазір жауап — жоқ. Неге? Автобустардың қозғалыс тұрақтылығы 93-98 %- ға жетті. Егер бұл жолаққа басқа автомобильді жіберсек, автобустардың жүріс интервалы артады. Көптеген адам қазір уақытылы жүретін автобустарға ауысуда. Сондықтан жауап осындай, — деді министр.
Министр сондай-ақ белсенділердің үлкен айналма жолдағы жылдамдықты 140 км/сағ-қа көтеру өтінішінен бас тартты. М. Қарабаевтың айтуынша, жол мамандары айналма жолдағы апаттардың себебін талдап, жол апатына көбінесе жылдамдық асырғандар түсетініне көз жеткізген. Сондықтан жылдамдық шегі бұрынғыдай — 120 км/сағ болып қалады. Ал жүк көлігіне арнайы оң жақтағы жолақты бөлу жөнінде ойланып көретінін айтты. Бірақ бұл мәселе жақын арада шешілмейді, өйткені барлығын мұқият талдап, стандарт пен ережеге өзгеріс енгізу қажет.
Комментариев: 0