Инфляцияның үдеуі мен шикізат бағасының өсуіне байланысты әлемнің көптеген елінде машина қымбаттады. Қазір автомобиль құнына әсер ететін маңызды факторлардың бірі — жыл сайын күрделеніп келе жатқан электроника.
Борттағы қауіпсіздік жүйесі мен автопилот жұмысы үлкен есептеу ресурсын талап етеді. Компьютерлік жабдық тұрғысынан алғанда ол — қатты күйдегі жад модулі. Reddit платформасын пайдаланушылар оның бағасы 2025 жылы алтыннан асып түскенін байқаған.
Tom’s Hardware порталы нарықты талдап, бұл қорытындыны растады. Мысалы, 8 ТБ көлемді SSD жинақтағышының орташа бағасы шамамен 1476 долларға жетіпті (чип салмағы 8 грамм), ал салмағы дәл сондай алтын 1148 доллар тұрады.
Жасанды интеллект және дата-орталық саласындағы компаниялардың чипке сұранысы артып келеді, соған байланысты ажиотаж туындап отыр. Қазір төртінші (DDR4) және бесінші (DDR5) буындағы жад модульдеріне сұраныс өте жоғары. Микрочип өндірушілер көбіне пайда көп түсетін серверлер мен дерек өңдеу орталықтары үшін жұмыс істеп, тұрмыстық электроника мен автомобиль чиптерін аз өндіріп жатыр деп жазды «Российская газета».
Соның салдарынан баға күрт өскен. Сала мамандарының айтуынша 2025 жылы жад модульдерінің құны шарықтап кетті: DDR4 бағасы — 1800 %, ал DDR5-тікі 500 % өсіпті.
Қазір тапшы болып отырған қымбат кремний чиптері автомобиль бағасын жоғарылатып жібергені анық. Nio компаниясының негізін қалаушы Ли Бин 2026 жылы жад модулі автоконцерндер үшін аккумулятордан да маңызды шығын көзіне айналуы мүмкін деді.
Комментариев: 0