Porsche Taycan-ға жалған беріліс қорабын орнатады

Porsche электрокарларына арнап «виртуалды трансмиссия» деп аталатын жаңа жүйе әзірлеп жатыр. The Drive басылымы дереккөзіне сүйеніп хабарлағандай, Porsche аймақтағы өкілдеріне жаңа жүйе жақында пайда болатынын ескерткен. Басылым компания топ-менеджерлері автомат қорапқа ұқсайтын N e-Shift жүйесімен жабдықталған Ioniq 5 N-нің артықшылығын мойындағанын атап өтті.

Инсайдерлер «виртуалды трансмиссиямен» жабдықталған Porsche модельдерінің прототипі дайын екенін хабарлады. Қолда бар ақпаратқа сүйенсек, Porsche электромобиліндегі «берілісті» рөлдің астында тұратын тетікпен ауыстыруға болады. Жаңа функцияны бұған дейін шыққан көліктерге бағдарламалық жасақтаманы қашықтан жаңарту арқылы орнату мүмкін емес, өйткені марканың қазіргі электрокарларында мұндай элемент жоқ.

Фейк беріліс қорабын алдымен жақында тағы рестайлингтен өтетін Taycan иелері сынап көреді. Taycan бұл ерекше функциямен қатар электрлі Cayenne-нің жаңа медиажүйесін алады. Бренд виртуалды трансмиссияны Cayenne мен Macan Electric-ке де қояды, бірақ олар қашан жаңаратыны белгісіз. Cayman мен Boxster-дің батареялы түрленіміне де арнайы тетік орнатады деген болжам бар.

Porsche 2026 жылы тамызда Taycan-ға тапсырыс қабылдай бастайды.