Қазақстаннан шыққан автобустарды Қырғызстанның тәртіп сақшылары тексеріп жатқан сәт жазылған ролик әлеуметтік желіде тарады. Одан форма киген ер адамның жүргізушілер бензинді шекарадан қалай өткізетінін түсіндіріп жатқанын көруге болады. Мәселен, бір автобустың қуат жүйесіне дизелі бар қосымша ыдыс қосып қойыпты. Ол шекарадан өтуге жетеді. Ал штаттық 200, 300, 500 литрлік бактарға жанармай толтырып, көрші елде саудалайды. Жүк қоятын жерге де қосымша резервуар қояды екен.
Қырғыз полицейлері берген мәліметке сүйенсек, біраз уақыт бұрын олар Шу облысында жанармай толтырып алған 36 қазақстандық автомобильді ұстаған. Машиналардың жиырма тоғызы – жол талғамайтын жеңіл көлік, қалғаны автобус.
Оларды айыптұраққа жіберіп, жүргізушілерге айыппұл салыпты. Бірақ ондай көліктер біздің шекарада тексерістен қалай өтетіні түсініксіз. Жергілікті кеденшілер шекара қызметі және полициямен бірігіп, көрші елге штаттық бактан басқа жолмен жанармай өткізуге тыйым салатын бұйрық шығарған. Оның үстіне бұл органдар елдің экономикалық мүддесін қорғауға тиіс.
Сарапшылардың пікірінше отынның көбі Қырғызстанмен шекаралас Жамбыл облысынан кетіп жатыр. Бірақ мемлекет мәселені погон таққандарды өз жұмысын атқаруға міндеттеудің орнына, жанармай бағасын көтеру арқылы шешуді жөн көрді.
Комментариев: 0