Ел президенті полицияға көлік жүргізушілерінің қарбалас сәттерден тыс уақытта және демалыс күндері автобус жолағымен жүру мүмкіндігін қарстыруды тапсырған болатын. 17 мамырда жол ережесіне өзгерістер енгізу туралы бұйрық жобасы қоғамдық талқылауға шығарылды. Құжатта «Маршруттық көлік құралдарының басымдығы» бөлімінің 2-тармағына өзгеріс енгізу ұсынылған. Онда автобус, троллейбус пен қызметтік таксиге арналған жолағы бар жолдарда сағат 07:30-дан 9:30-ға дейін және сағат 17:00-ден 20:00-ге дейін қоғамдық көліктер ғана жүреді. Ал қалған уақытта және демалыс күндері осы жолақта басқа көлік құралдарының жүруіне шектеу қойылмайды делінген. Жоба мамыр айының соңына дейін талқыланады, яғни биыл маусымда қарапайым машиналар да арнайы сызықпен жүруі мүмкін.
Түзетулер күшіне енгеннен кейін автокөлік жүргізушілері Алматыдағы BRT желісімен жүре ала ма? Осы сұрақ жауапсыз қалып отыр. Ереже бойынша бұл жолдар автобус жолағымен тең дәрежеде. Бірақ жолдың өзге бөлігінен тек ерекше жағдайда кесіп өтуге болатын ақ сызықпен бөлінген. Десе де жүргізушілер қиылыста BRT желісіне кіріп, таңба үзілген келесі қиылыста қайта шығып кетсе болады.
Комментариев: 0