Алматы облысының Панфилов ауданында Audi 100 бен Toyota Camry-дің соғылуы салдарынан үш адам мерт болып, тағы үш адам Жаркенттегі ауруханаға жеткізілген болатын. Өңірдегі Полиция департаментінің баспасөз қызметі хабарлағандай, жарақат алғандардың ішінде Audi-дің 26 жастағы жүргізушісі Ерасыл Бейсембай да бар. Ауруханадан шыға салысымен ол күдікті ретінде қамауға алынды.
Тергеу барысында апат болған сәтте жүргізушінің мас болғаны анықталды. Оның үстіне апат кездейсоқ болмаған — Е.Бейсембай ауылдасымен (екеуі де Әулиеағаш ауылында тұрған) ерегісіп қалып, ішінде бес адам отырған Camry-ді әдейілеп соққан. Нәтижесінде, бастапқыда ҚР ҚК-нің 345-бабы (Абайсызда адам өліміне әкеп соққан ЖКО) бойынша қаралған іс аталған кодекстің 99-бабына ("Адам өлтiру) ауыстырылды.
Алматы облыстық сотының үкімімен Ерасыл Бейсембай 20 жылға бас бостандығынан айырылды және жазасын қауіпсіздігі барынша жоғары түзету мекемесінде өтейді. Одан бөлек, сот айыпкерді зардап шеккен тарапқа 13 миллион теңге көлемінде өтемақы төлеуге және мемлекетке 300 мың теңгеден аса қаражат құюға міндеттеді.
Комментариев: 0