Атырау тұрғындары алаяққа алданды

Атырауда бір топ кісі полицияға арыз жазды. Кtk.kz хабарлағандай, олар мініп жүрген машинасын сату үшін салонға өткізіп, жер сипап қалған. Автосалон қысқа уақытта клиент тауып, нарықтағыдан жоғары бағаға сатып береміз деп уәде беріпті. Бұған сенген жұрт көлігін кеңсеге апарып, салон қызметкерінің атына рәсімдеген. Бірақ техникадан да, ақшадан да хабар болмапты. Автосалонға иелік еткен екі адам ұсталды, қазір изоляторда отыр.

Полиция тергеу басқармасы «Абырой Авто» мекемесіне қатысты Қылмыстық кодекстің 190-бабы, 2-бөліміне сәйкес (алаяқтық) іс қозғағанын хабарлады. Зардап шеккен кісілердің саны 90-нан асады, бәрі Атырау облысының тұрғындары. Қазір бұл автосалонға көлік алу/сату операцияларын жүргізуге тыйым салынған.

Күдіктілердің кінәсі дәлелденсе мүлкi тәркiленiп, белгілі бір лауазымдарды атқару немесе белгілі бір қызметпен айналысу құқығынан үш жылға дейінгі мерзімге айыра отырып немесе онсыз, 4000 АЕК-ке дейiнгi мөлшерде айыппұл салу не сол мөлшерде түзеу жұмыстарына не 1000 сағатқа дейін қоғамдық жұмыстарға тарту не төрт жылға дейiнгi мерзiмге бас бостандығын шектеу не сол мерзімге бас бостандығынан айыру жазасы тағайындалады.

29.08.2025 ж. 10:30-да қосылған мәлімет:

Құзырлы орган алаяқтар сатып жіберген машиналарды пайдалануға тыйым сала бастады. Кtk.kz хабарлағандай, көлігі айыптұраққа кеткен кісілер Атырауға жиналып жатыр екен. Олар техниканы адал ақшасына алғанын айтып, прокуратурадан көмек сұрады.

Заң өкілдері оқиғаның мән-жайын анықтайды. Бүгін Атырау прокуроры Руслан Айтымов “нақты шешім қабылдаймыз” деп сөз берді.