Миллиардер суперкар аламын деп алаяққа алданған

Әйгілі онлайн-дүкеннің иесі Майкл Менте өзін 5.4 млн долларға алдап кеткен алаяқтарды сотқа берді. Jalopnik хабарлағандай, ол сирек кездесетін Mercedes-AMG One суперкарын алмақ болған. Алайда көліксіз және ақшасыз қалды.

2021 жылы Майкл Менте адвокат Скотт Оливердің көмегімен сирек кездесетін көліктер сататын француз дилері Жан-Пьер Клементке хабарласыпты. Дилер оған автомобильді өз қалауынша құрастыру мүмкіндігін ұсынған.

Шамамен бір жылдан кейін АҚШ Ішкі қауіпсіздік министрлігінің тергеушілері миллиардерге алаяқтың құрығына түскенін хабарлады. Шын мәнінде ешқандай Жан-Пьер Клемент болмаған, ол осыған ұқсас бірнеше қылмысқа қатысы бар Техас тұрғыны Травеон Роджерс болып шықты. Бұған дейін өзін Aston Martin өкілі ретінде таныстырып, банк құжаттарын қолдан жасапты. Майкл Ментені сан соқтырған соң Роджерс сол айласын тағы сәтті қолданып, 2023 жылы басқа бір Америка тұрғынына Mercedes-AMG One суперкарын “сатып”, 3.2 миллион доллар пайда тапқан.

Травеон Роджерс жеті жылға сотталды. Майкл Менте еркіндікте жүрген адвокат Скотт Оливерге қарсы шағым түсірген. Бірақ Оливер ештеңе білмегенін айтып, кінәсін мойындамай отыр.