Алматыда алаяқтар BMW M3-ті эвакуатормен ұрламақ болды

Маусымның басында Алматы тұрғыны 60 млн теңге тұратын BMW M3 универсалы ұрланды деп полицияға жүгінді. Polisia.kz хабарлағандай, қаскөйлер көлікті иемдену үшін эвакуатор пайдаланған.

Қылмыскерлер көлігін тасымалдағысы келетін жүргізуші мен эвакуатор немесе автотасымалдаушының арасында делдал ретінде әрекет етеді. Олар бір тарапқа өзін тасымалдаушы компанияның өкілі ретінде таныстырса, екіншісіне клиент болып хабарласады. Кейін машинаны жеткізу туралы келісіп алады, бірақ мекенжайды өзгертіп, автомобильді басқа тасымалдаушыға жібереді.

Жедел іздестіру шараларының нәтижесінде полиция BMW M3-ті тауып, заңды иесіне қайтарды. Үш күдікті ұсталды. Қазір сотқа дейінгі тергеу жүріп жатыр.

Ішкі істер министрлігі ұрлықтың осындай түрі белең алғанын атап өтіп, мынадай сақтық шараларын ұстануға кеңес береді:

• Жүргізушінің жеке куәлігі мен көлік құжатын мұқият тексеру.
• Тасымалдаушының телефон нөмірін хабарландырудағы нөмірмен салыстыру.
• Бағыт пен мекенжайды алдын ала талқылау.
• Интернетте тасымалдаушы мен жүргізуші туралы пікірлерді қарап шығу.

Әлденеден күдіктенсеңіз, құжатта сәйкес келмейтін жерлер болса немесе басқа күмәнді істі байқасаңыз, тасымалдаушы қызметінен бас тартып, дереу 102 нөміріне хабарласақан жөн.