Қоғамдық көлік саналмайтын машиналардың арнайы жолақпен жүруіне рұқсат беру туралы әкімдік ұсынысына қала тұрғындары онлайн дауыс беріп жатыр. Жергілікті билік автомобиль иелеріне мынадай сұрақтар қойды:
- Астанадағы автобус жолағымен 9:30-дан 17:00-ге дейін және 20:00-ден 7:30-ға дейін барлық қозғалысқа қатысушының жүруіне рұқсат беру керек пе?
- Егер автобус жолағымен 9:30-дан 17:00-ге дейін және 20:00-ден 7:30-ға дейін барлық қозғалысқа қатысушының жүруіне рұқсат берілсе, бұл жедел жәрдем, өрт сөндіру техникасы, ТЖ қызметі мен апат болғанда көмек беретін қызметтердің діттеген жеріне жету уақытына қалай әсер етеді?
Респонденттер тағы бірнеше қосымша сұраққа жауап беруге тиіс.
Дауыс жинау 27 ақпанға дейін жалғасады, қазір 1258 адам пікір білдірген.
Біраз уақыт бұрын әкімдік тәжірибе ретінде барлық жүргізушіге Абылай хан даңғылының Пушкин мен Манас аралығында сызылған арнайы жолақпен белгіленген уақытта еркін жүруге рұқсат берген.
ҚР ІІМ Әкімшілік полиция комитеті президент ұсынысынан кейін бүкіл көліктің арнайы жолақпен жүруіне рұқсат беретін заң жобасын дайындады. Жоба еGov.kz сайтына 2021 жылы жарияланған, бірақ әлі қабылданбады.
Жобаға урбанистер бірден қарсы шықты, олар бұл қоғамдық көлік қозғалысына кедергі келтіріп, арнайы машиналардың уақытын алады деп мәлімдеді.
Десе де былтыр көктемде Алматыда «уақытша» автобус жолағы пайда болды.
Комментариев: 0