ҚР ИИДМ Автомобиль жолдары комитеті еліміздің батыс аймағындағы жолдардың жөнделу барысын тексерді. Жол жөндеушілер мынадай ақпарат берді:
- Ақтөбе — Қандыағаш тас жолының 28 шақырымына іргетастың төменгі қабаты, 26.5 шақырымына жоғарғы қабаты, ал 22.5 шақырымына жабынның төменгі қабаты төселді. Жалпы 1160 мың тонна асфальт-бетонның 288 мың тоннасы төселді. 41 шақырым жолдың бір жолағы ашылды. Жыл аяғына дейін тағы 16 шақырым жолмен көлік жүре алады.
- Қандыағаш — Мақат тас жолының 299 шақырымы толық ашық. Қазір жолды жабдықтау жұмысы жүріп жатыр.
- Биыл жыл аяғына дейін Атырау — Ресей шекарасы (Астрахань) тас жолының 130 шақырымы (жалпы 277 шақырым) ашылады. Жоба 2023 жылы толық аяқталады деп жоспарланып отыр.
ҚР ИИДМ АЖК мердігерлерге жол бөліктері қыста пайдалануға дайын болсын деген тапсырма беріп, келер жылға құрылыс материалын дайындауды тапсырды. Шенділер Ақтөбе — Қандыағаш тас жолында көлік қозғалысының қауіпсіздігі мен тоқтаусыз жүруіне баса мән беруді міндеттеді. Ал Қандыағаш — Мақат бөлігіндегі қауіпсіздікке әсер ететін ақауларды 25 қазанға дейін жоюды тапсырды.
Аталған жол бөліктерін ашу үшін асфальттың тек төменгі бос қабаты төселіп жатыр. Мұндай асығыс қадамның соңы неге соғатынын «Алтын Орда» маңындағы Алматы — Ташкент тас жолынан көрдік, асфальттың төменгі қабаты тез тозып, жаңасына ауыстыруға тура келді. Еліміздің батыс аймағында жеңіл машиналардан бөлек ауыр жүк көліктері де көп жүреді. Көктемге қарай батыстағы тас жолдар қандай жағдайда болатыны белгісіз.
Комментариев: 0