АҚШ-тағы алпауыт Chevron энергетикалық компаниясы автокөлікке арналған отын шығару үшін тезекті өңдейді. Ақпаратты Bloomberg хабарлады. Бұл көмірқышқыл газының ауаға тарауын азайту бағдарламасы аясында жүзеге асады. Жеті штатта 28 зауыттың құрылысы белсенді жүріп жатыр, олардың бірі биыл қолданысқа беріледі. Одан бөлек биомассадан алынатын табиғи газ — биометан өндіретін тағы 10 кәсіпорын ашу жоспарланып отыр.
Балама отын түрі жүк көліктеріне құйылады. «Біз жүк көліктерінің осы отын түріне көшуіне ықпал ете аламыз деп ойлаймыз», — деді Chevron компаниясының жанар-жағармай материалдары бөлімшесінің вице-президенті Энди Вальц.
Биометанның қымбат болуы мен сақтау шарттары оны жеңіл көлікке пайдалануға кедергі болып отыр. Газ өте ауыр және қалың баллонда, 20 МПа қысымда сақталуға тиіс.Көлемі 50 литр ыдысқа 10 текше метр газ сыяды. Есеп бойынша үш тонналық автомобильді (мысалы, Land Cruiser 300) тәулік бойы биометанмен қамтамасыз ету үшін газ толтырылған 50 литрлік 8 баллон керек. Олардың жалпы салмағы 700 келіден асады. Ал биогазды сұйылту тым қымбатқа түседі және шығынды ақтамайды.
Комментариев: 0