Жол қауіпсіздігі туралы үкімет отырысында премьер-министр жол апатының жиілеуіне себеп болып отырған мәселеге тоқталды. Оның айтуынша инфрақұрылымның дұрыс болмауы апат саны артуына үлес қосып жатыр. Халық та бұған жиі шағымданады.
— Мысалы, 26 қыркүйекте Ақтөбе тұрғындары айналма жолды жауып тастады. Ол бөлікте шам, жаяу жүргінші өткелі, қауіпсіздік элементтері жоқ. Мұның бәрі талай апатқа себеп болған, — деді Смайылов.
Шенді қазір басты міндет жол қауіпсіздігіне қатысты мәселені шешіп, апат пен адам өлімін азайту екенін атап өтті.
ІІМ пікірі де осыған ұқсас. Отырыста ведомство басшысы Марат Ахметжанов елдегі жолдардың 2 %-ы ғана бірінші категорияға сай екенін айтты. Яғни төрт және одан көп жолағы бар, қалғаны ескі стандарт бойынша салынған, ені 7 метрден аспайтын екі жолақты жолдар. Мұны өзгерту керек, өйткені адам өліміне әкелген жол апатының көбі қала маңындағы трассаларда болады.
Жолдың ғана емес, жол бойындағы инфрақұрылымның болмауы да жағдайды қиындатып отыр. Нақтырақ айтсақ, кемпинг, демалатын, ас ішетін орындардың болмауы жүргізушілерді көз ілмей, тынығып алмай жүруге міжбүрлейді, бұл апатқа ұшырау қаупін арттыратыны анық.
ІІМ басшысының пікірінше жүргізушілерді де ұмытпау керек. Жолаушы тасымалдау ережесін бұзатын және сапасы нашар көлік тізгіндейтін адам да аз емес. Жыл басынан бері 800 машина аударылып, 1195 көлік бір бағытта келе жатып, 1250-і бетпе-бет соғылған.
Комментариев: 0