Мегаполисте 19 наурыздан бастап енгізілетін карантин уақытында қалаға облыстан келетін жұмысшылар кіргізілмейді. Бұл туралы Алматы әкімінің орынбасары Сапарбек Тұяқбаев айтты. Оның сөзінше, мұндай шарасыз карантиннің мәні болмайды.
Бұл жағдайда не істеу керек деген сұраққа да жауап табылды. Әкімдік жұмыс берушілерге өз қызметкерлеріне тез арада қала ішінен тұратын орын тауып беруге не оларды ақылы демалысқа жіберуге кеңес берді.
— Облыстан күніне жарты миллионға жуық адам қалаға қатынайды. Біз тұратын жер табуға көмектесуге дайынбыз. Мейманханалар мен хостелдер бос тұр, бұл карантин кезінде қалаға уақытша көшуге жақсы мүмкіндік. Егер бұл мүмкін болмаса, ақылы демалысқа жіберу не қашықтықтан жұмыс істеу режиміне көшіру керек. Одан бөлек, сауда-саттық саласындағы көптеген адамдар жұмыстан босады. Сол себепті азық-түлік сататын дүкендер мен дәріханалардың үздіксіз жұмыс істеуін қамтамасыз ету үшін жаңа кадрлар алуға мүмкіндік бар, — деді Сапарбек Тұяқбаев.
Кеше ҚР премьер-министрінің баспасөз қызметінің Нұр-Сұлтан мен Алматы маңында тұратын, бірақ қала ішінде жұмыс істейтін тұрғындардың қозғалысына шектеу қойылмайтынын мәлімдегенін айта кеткен жөн. Алайда бүгін олар бұл шешімнен бас тартқан сияқты.
“айтты” емес, “мәлімдеді” – деп жазу дұрысырақ болады.