Қасым-Жомарт Тоқаев Алатауды дамыту жөніндегі кеңесте Алматы агломерациясын дамыту туралы да айтты.
«Күн сайын Алматыға облыс аумағынан шамамен 400 мың автомобиль кіреді. Алматы агломерациясының ішкі транспорт байланысын жақсартып, жоғары жылдамдықты қоғамдық көлікті дамыту қажет», — деді мемлекет басшысы.
Бұл мәселені шешу үшін ол Алматы қаласы мен Алматы облысының әкіміне «Самұрық-Қазына» қорымен бірлесіп, 2026 жылғы 1 тамызға дейін қала шекарасынан шығыс және батыс бағытта жүретін SkyTrain желісінің барлық аспектісін әзірлеуді тапсырды.
Оның сөзінше жаңа шаһардың Үлкен Алматы айналма жолының бойында орналасуы және Алатауды Қорғаспен байланыстыратын теміржол тармағын салу жоспары болашақта Алматы агломерациясының шегінен тыс аумақтарды да қамтитын ірі өңірлік кластердің қалыптасуына мүмкіндік береді.
Мегаполис билігі Алматыдан Талғар мен Қаскелеңге дейін жоғары жылдамдықты электротранспорт желісін салу жөнінде бірнеше мәрте айтқан. Бірақ бұл бастамалар сөз жүзінде қалып отыр. Мегаполистің бас жоспарының бір нұсқасында жоғары жылдамдықты трамвай желісін жүргізу идеясы болған. Сондай-ақ шенділер оңтүстік астанадан Қонаевқа баратын LRT салуға ниетті.
Анықтама: SkyTrain — жерүсті электротранспорт жүйесі, мұнда жоғары жылдамдықты пойыз эстакада арқылы қозғалады. «Әуе метросы» алғаш рет өткен ғасырдың 80 жылдарында Канада еліндегі Ванкуверде іске қосылған, ал қазір ең танымалы — Бангкок қаласындағы BTS Skytrain.
Комментариев: 0