Үкімет Алматы облысында G4 City қаласын дамыту жөніндегі бас жоспар тұжырымдамасын бекіту туралы қаулы дайындады.
Қай жерде орналасады
Жалпы аумағы 13 мың гектарға жуық жаңа қала Қапшағай тас жолының бойында, Үлкен Алматы айналма жолынан су қоймасына дейін созылады. Жаңа мегаполис үш ауданға бөлінеді:
- Gate-Golden Districts — қаржы-іскерлік;
- Growing District — сауда-логистика;
- Green District — мәдениет және демалыс орталығы.
Қалай баруға болады
Қалада шамамен 2.5 миллион адам қоныстанады деген жоспар бар, демек осынша халықтың жүріп-тұруына қолайлы қатынас құралы керек. Оның үстіне билік G4 City-ді елдің болашақ экономикалық және мәдени орталығы болады деп отыр. Сол үшін ең алдымен көлік мәселесін шешу қажет.
Тұжырымдамада көлік тақырыбы бірнеше жерде айтылған, соған қарап алдын ала мынадай қорытынды жасауға негіз бар:
- Қазіргі Қапшағай тас жолы мен болашақ Үлкен Алматы айналма жолын қайта жөндеп, жаңа эстакадалар мен жерасты жаяу жүргіншілер өткелін салады. Ал қала ішіндегі бұл жолдармен қиылысатын жолайрық азаяды.
- Алматыдан Қонаевқа дейін LRT желісі салынады. Тұжырымдамада көліктің бұл түрі бірде «метро», бірде «трамвай» деп аталған. Соған қарағанда құжат әлі шикі көрінеді. Дегенмен эскизден оңтүстік астана мен Қапшағайды жер үстінде орналасқан жеңіл рельсті жол байланыстырып тұрғанын көруге болады. Біздің елде мұндай көлік жолын салудан тәжірибе «мол» — елордадағы LRT ешқашан естен кетпес.
Жоба авторлары бекеттерді 800–1200 метр қашықтықта орналастыруды ұсынады. LRT Қапшағай тас жолының бойымен Алматыдан Үлкен Алматы айналма жолына дейін барады да, G4 City ішінде бағытын өзгертіп, сонда салынатын әуежайдың жанынан өтіп, Қонаев қаласының орталығына дейін барады.
Тұжырымдама авторлары Green District «демалыс» аймағында океанариум, мұражай және өзге де ойын-сауық, мәдени нысандармен бірге Формула-1 жарыс жолын салуды ұсынады. Шенділер осы арқылы қалаға жыл сайын 4.5 млн турист тартуға ниетті.
G4 City қашан салынады
Жобаны үш кезеңге бөліп жүзеге асыру жоспарланған:
- 2022–2030 жж
- 2031–2040 жж
- 2041–2050 жж.
Бірінші кезеңде, яғни алдағы жеті жылда қалада кеңселер, сауда орталықтары және ойын-сауық нысандарымен қатар тұрғын үйлер салынады. Құжатта Алматыдан Қонаевқа жүрдек трамвай қашан қатынайтыны айтылмаған. Бірақ LRT алдымен Алматыда іске қосылатыны анық. Содан кейін ғана Қапшағайға салынады.
Қазақстан билігі G4 City жобасы туралы айтып жүргеніне он жылдан асты. Жаңа жобада ол G4 емес, G3 болғанын байқадық. Бұл тұжырымдама қабылданып, қаланы дамыту жөніндегі бас жоспарға айнала ма, жоқ па, қазірше белгісіз.
Комментариев: 0