Алматы әкімі Бақытжан Сағынтаевтың айтуынша, еңбекші халықтың біраз бөлігі Талғар мен Қаскелеңнен қатынайды. Электрлі пойызды іске қосу бұл процессті жеңілдетеді.
«Адамдар мен автокөліктердің күнделікті барыс-келісін жеңілдету үшін қала сыртына қатынайтын қоғамдық көлік саласын дамыту қажет. Алматы — Ұзынағаш бағытындағы пойыздар саны артты. Жаңа жылдан бастап Қапшағай бағытын іске қосамыз», — деді қала басшысы.
Өз кезегінде Қасым-Жомарт Тоқаев соңғы жылдары оңтүстік астананың көлік инфрақұрылымын дамыту үшін көптеген жұмыстар жүргізілгенін, алайда бірқатар күрделі мәселелердің әлі шешілмегенін атап өтті.
«Қала бойынша күнде қатынайтын 700 мың көлік миллионнан аса адамды тасымалдайды. Күн сайын тек Қаскелең, Қапшағай, Талғар жақтан Құлжа тас жолы арқылы 200 мыңнан аса көлік қалаға кіреді. Бұл Алматыға кірер жолда кептеліс тудырады. Мәселені жолды қайта жөндеп, кеңейту арқылы және көлік инфрақұрылымын дамыту арқылы да шешу керек. Мысалы, метро желілерін және қала мен жақын маңдағы елді мекендер арасын жалғайтын қоғамдық көлікті дамыту арқылы шешу қажет», — деді президент.
- Бүгінгі жиналыста мемлекет басшысы қаладағы трамвайларды жою туралы шешімнің асығыс қабылданғанын атап өтті.
- Қазіргі уақытта үкімет әзірлеп жатқан Алматы агломерациясын қалыптастыру жоспарында Bus Rapid Transit (BRT) автобус желілері мен Light Rail Transit (LRT) трамвайлары желілерін Алматыдан батыс бағытқа (Ұзынағаш ауылына дейін), солтүстік бағытта (Қапшағай қаласына дейін) және шығыс бағытта (Шелек ауылына дейін) дамыту туралы жазылған.
Комментариев: 0