ҚР Көлік министрлігі Балқаш — Бурылбайтал, Бурылбайтал — Күрті және Талдықорған — Өскемен автожолын ақылы ету туралы бұйрық жобасын дайындады. Бұл трассаларда жол ақысы мемлекеттік нөмірді тану жүйесі арқылы автоматты алынады, яғни автомобильді тоқтатудың қажеті жоқ. Алым мөлшері көліктің санаты мен жүріп өткен қашықтығына байланысты. Шенділер алым мөлшерін әлі нақты белгілеген жоқ.
Балқаш — Бурылбайтал
Көлік министрлігі Kolesa.kz редакциясына хабарлағандай, бұрын Балқаштан Бурылбайтал ауылына дейінгі жол бөлігінде (91 км) ғана ақы алынатын. Енді бұйрыққа енген өзгеріске сәйкес Қарағандыдан Бурылбайталға дейінгі 645 км жол толық ақылы.
Қарағанды облысында (Бұқар жырау, Абай, Шет, Ақтоғай ауданы мен Балқаш, Приозёрск қаласы), Жамбыл облысында (Мойынқұм ауданы), Алматы облысында (Жамбыл ауданы) тіркелген жеңіл автомобиль иелері айлық және жылдық абонементпен жүреді.
Бурылбайтал — Күрті
Бұл жол бөлігінде (226 км) барлық категориядағы көлік құралы жол ақысын төлейді.
Жамбыл облысында (Мойынқұм ауданы) және Алматы облысында (Жамбыл, Іле аудандары) тіркелген жеңіл автомобиль жүргізушілері айлық және жылдық абонемент ала алады.
Демек Алматыдан Қарағандыға дейінгі жол толық ақылы. Болашақта қазір құрылыс жүріп жатқан Күртіден Қонаевқа дейінгі жол бөлігі де ақылы болмақ.
Талдықорған — Өскемен
Жеңіл автомобиль үшін бұл трассаның алғашқы 32.4 шақырымында жол ақысын төлеу керек. Қалған бөлігінде жеңіл көліктер тегін жүреді. Ал автобус пен жүк көлігі толық 773 шақырымға ақы төлейді.
Алматы облысында (Ескелді, Ақсу, Сарқан, Алакөл ауданы), Абай облысында (Үржар, Аягөз, Жарма ауданы) және Шығыс Қазақстан облысында (Ұлан ауданы) тіркелген автомобиль иелері айлық және жылдық абонемент ала алады.
Бұйрық жобасы 17 наурызға дейін қоғам талқысына шығады. Демек биыл сәуірден бастап Күртіден Қарағандыға дейінгі және Талдықорғаннан Өскеменге дейінгі автожол ақылы болуы мүмкін.
Комментариев: 0