Мегаполис әкімінің «Алматы қаласында ақылы коммуналдық орынтұрақтарды орналастыру орындарын айқындау туралы» қаулысы 4 шілдеде жарияланды. Құжат он күн өткен соң, яғни 15 шілдеде күшіне енеді. Қаулыда 338 жаңа ақылы тұрақ аймағы жазылған. Олардың көбі тұрғын аудандарда.
Жаңа ақылы тұрақтың толық тізімін мына сілтеме арқылы көре аласыз.
Мысалы, № 2013 тұрақ аймағы Жамбыл көшесінің Розыбакиевтен Әуезовке дейінгі бөлігінде болады. Дәл осы ауданның тұрғындары былтыр күзде тұрғын аудандағы ақылы тұраққа қарсы петиция жариялап, үйдің маңындағы жол белгілерін алып тастауды талап етті. Биыл 21 сәуірдегі жағдай бойынша петицияға 1262 адам қол қойған. Қала билігі шағын көшелердегі тұрақтарды ақылы қылмайтынын және бұл мәселені қайта қарайтынын мәлімдеген еді.
Көшеге ақылы тұрақ белгісін орнату жұмыстары былтыр басталған, бірақ әлеуметтік желіде қызу талқыға түскен соң әкімдік бұл жұмысты толық аяқтамады. Төлем тәртібі туралы ақпарат ілінуге тиіс бағандар бос қалды. Енді 15 шілдеге дейін тұрақтар толық жабдықталып, жүргізушілерден ақы алына бастайды.
Ақылы тұрақтың маңында тұратын азаматтарға арналған рұқсат мәселесі әлі күнге дейін шешілген жоқ. Бір ай бұрын Алматы әкімдігі қоғам талқысына «Жол жүрісі қағидаларымен реттелмеген бөлігінде Алматы қаласында жол қозғалысын ұйымдастыру қағидаларын бекіту туралы» мәслихат шешімінің жобасын ұсынды. Құжатта төлем тәртібі, жеңілдікті категория енгізу және үйінен 500 метр радиустағы тұрақты тегін пайдалану алгоритмдері қарастырылуға тиіс. Алайда әкімдік жоба мәтінін толық жарияламады, себебі ереже әлі бекітілмеген, оны көпшілікке көрсетуге болмайды. Сондықтан халық көлікті тұраққа тегін қою мүмкіндігін қалай рәсімдейтіні белгісіз.
2026 жылдың аяғына дейін Алматы әкімдігі қалада тағы 8 мыңдай ақылы тұрақ салуды жоспарлап отыр. Тұрақты пайдалану тарифін өзгерту мәселесін де қарастырып жатыр.
Комментариев: 0