«Алматы паркинг» ЖШС көшедегі ақылы тұрақ желісін кеңейту жоспарын жариялады. Inform.kz хабарлағандай, қазір мегаполисте 17 мыңнан аса ақылы автотұрақ бар. Биыл жыл аяғына дейін қалада тағы 8 мыңға жуық тұрақ орны пайда болады.
— Бұл шара көшелердің өткізу қабілетін арттырып, тұрақ кеңістігін тиімді пайдалануға бағытталған, — дейді «Алматы паркинг» өкілдері.
Қазір қаланың коммуналдық меншігіндегі ақылы тұрақтардың көбі Алмалы ауданында орналасқан — 5363. Одан кейін Медеу (5102) мен Жетісу (3494) аудандары тұр. Алатау ауданында 2637 автомобильге арналған тұрақ бар. Бұл көрсеткіш Бостандықта — 787, Түрксібте — 290, Наурызбайда — 92 және Әуезов ауданында — 60.
Алматы әкімдігі оңтүстік астанада жол ережесі бойынша реттелмейтін бөлікте жол қозғалысын ұйымдастыру қағидасын әзірлеп жатыр. Құжатта автотұрақ кеңістігін (коммуналдық және жекеменшік тұрақтар) ұйымдастыру және пайдалану тәртібі көрсетілген. Яғни төлем жасау, жеңілдік категориясы және азаматтарға өз үйінен 500 метр радиус ішінде тұрақты тегін пайдалануға рұқсат беру сияқты ережелер белгіленген. Бірақ шенділер бұл жобаны азаматтардан жасырып, құжаттың қысқа нұсқасымен ғана танысуға мүмкіндік беріп отыр.
Комментариев: 0