Алматы тұрғындары үйінен 500 метр радиустағы тұраққа машинасын тегін қоя алады

Алматы қалалық мәслихат әзірлеген тұрғындар үшін аса маңызды екі жоба eGov.kz порталының «Ашық НҚА» бөлімінде қоғамдық талқыға шықты.

Жобаларға сілтеме:
— «Жол жүрісі қағидаларымен реттелмеген бөлігінде Алматы қаласында жол қозғалысын ұйымдастыру қағидаларын бекіту туралы»
— «Алматы қаласының коммуналдық меншігіндегі арнаулы алаңдарда, тұрақтарда көлік құралдарын жеткізгені (эвакуациялағаны) және оларды уақытша сақтағаны үшін төлемақы мөлшерін айқындау туралы»

Құжатта автотұрақ кеңістігін (коммуналдық және жекеменшік тұрақтар) ұйымдастыру және пайдалану тәртібі көрсетілген. Яғни төлем жасау, жеңілдік категориясы және азаматтарға өз үйінен 500 метр радиус ішінде тұрақты тегін пайдалануға рұқсат беру сияқты ережелер белгіленген.

Сондай-ақ жобада көлік құралын арнайы тұраққа жеткізу (эвакуация), уақытша сақтау және иесіне қайтару тәртібі және арнайы тұрақ орындарына қойылатын талаптар жазылған.

Құжат әзірлеушілер «жобада жеке мобильділік құралдарын (самокат) орналастыру және пайдалану мәселесіне,оның ішінде оларды тұраққа қою тәртібі мен оператормен өзара іс-қимыл жасау тәртібіне ерекше назар аударылған. Сондай-ақ қорғаныш конструкциясы мен реттеуші элементтерді (шлагбаум) орнату мәселесін, автоматты бақылау жүйесін енгізуді және жол жүрісі қауіпсіздігін арттыруға әрі қаланың көлік инфрақұрылымын басқару тиімділігін қамтамасыз етуге бағытталған зияткерлік көлік жүйесін дамыту мәселелері қамтылған», — деп жазған.

Бірақ әкімдік заң мәтінін толық жариялаған жоқ, ҚР «Ақпаратқа қол жеткізу туралы» заңына сәйкес азаматтардың талабы бойынша шенділер құжат мәтінін толық ұсынуы қажет. Алматы қаласы Жол қозғалысы және жолаушылар көлігі басқармасы Kolesa.kz редакциясына жобаға әлі өзгеріс енуі мүмкін екені, сондықтан құжатты тұрғындарға көрсетуге болмайтынын айтты. Ендеше тұрғындар жобаны қалай талқылайды деген сұраққа әкімдік өкілдері жауап бере алмады.