Алматыдағы тұрақтарды бейнекамера қадағалайды

Қалалық мобильділік басқармасы Kolesa.kz редакциясына алаң типті ақылы тұрақтарға кіреберіс жерлерге автомобильдің кірген және шыққан уақытын тіркейтін камера қою жоспарда бар екенін айтты. Тұрақта шлагбаум болмайды, төлем QR-код көмегімен жасалады. Болашақта «электронды көз» қоғамдық бейнебақылау жүйесіне қосылады, бұл онда болатын көлік ұрлау, тонау, қирату сияқты қылмыстарды ашуға мүмкіндік береді.

Басқарма өкілдері шаһарда тұрақ ақысы әртүрлі болатынын атап өтті. Тарихи орталыққа жақындаған сайын көбірек шығындалуға тура келеді. Көлік қоятын орындар өзара қалай бөлінетінін және қайда қанша ақша сұралатынын мамандар талқылап жатыр екен.

Құрылғы биыл жазда сынақтан өтеді. Демек тұрғындар осы күзден бастап жаңа ережеге сай көлік қоюы мүмкін.

Былтыр жекенің қолында болған ақылы тұрақтардың бәрі қала меншігіне өтіп, компания басшылары ұсталған. Бір жыл өткен соң сот оларды миллиондаған ақша жымқырды деп танып, біраз жылға бас бостандығынан айырды.