Көше қиылысындағы таймерлер былтыр қаңтарда жоғала бастады. Сол кезде қалалық мобильділік басқармасы құрылғыларды профилактикалық тексеріс жүргізу үшін алып жатқанын, ақауы болса жөндеп не жаңартып, қайта орнына қоятынын айтқан.
Алайда олар сол күйі орнына оралмады. Уақыт өте келе цифрлы табло саны азая берді. Былтыр қазан айында жауапты басқарма Kolesa.kz-ке барлық таймерді жыл аяқталғанша қайта орнататынын хабарлады. 2023 жылдың алғашқы айы бел ортасынан асса да, еш өзгеріс байқалмайды, ал басқарма өткен жылы 14 қиылыстағы 180 таймерді жаңартқанын мәлімдеді. Жалпы жоспар бойынша 41 көше қиылысындағы 411 аспап екі жыл ішінде жаңаруға тиіс.
Tengrinews.kz «бағдаршам түстері жанатын уақытты кері санайтын таймерлерді алып тастауға олардың жол қозғалысын басқару жүйесіне сай жұмыс істей алмауы себеп болды, оларда көзге көрінетін ақау болған және мерзімі аяқталуына (10-15 жыл қызме еткен) байланысты жиі істен шығып қалатын» деп жазды.
Қалалық мобильділік басқармасы «СМЭУ Алматы» мекемесіне 180 аспапты ауыстырғаны үшін 100 млн теңге төледік деп есеп берді. Символ биіктігі 530 мм болатын жаңа таймер — 315 540 теңге, ал жаяу жүргіншілерге арналған (360 мм) табло 277 670 теңге тұрады екен.
Аз ақша емес екенін көріп отырмыз. Бірақ нақты есебін шығару үшін қолға калькулятор алдық. 315 540 деген соманы 180-ге көбейтсе 56 797 200 шығады. Әкімдік оны ауыстыруға 100 млн жұмсағанын ескерсек, бір таймерді монтаждау үшін 240 мың теңге төлегенін аңғарамыз.
Таймер бағасына келер болсақ, қытайлық электронды алаңдарда көлемі дәл сондай таймер үшін сатушылар $240 (114 108.38 теңге) сұрайды, яғни үш есе арзан. Ал кішілеу таймер төрт есе арзан — $115 (53 343.35 теңге) тұрады.
Кейбір жаңа бағдаршамда, мәселен Гагарин — Мыңбаев қиылысында есептегіш бар. Бірақ бір жылға созылған «профилактика және жөндеуден» кейін бұрынғы орнына қойылған таймер көргендер бар ма?
Комментариев: 0