Оқиға 14 шілде сағат 17:00 шамасында Райымбек даңғылында (Ақкент шағынауданына қарсы бетте) болған. Даңғыл бойымен батысқа қарай бара жатқан КАМАЗ мопедті соғып, қос дөңгелекті көлік жүргізушісі сол жерде қайтыс болды. Алматы қаласы ПД баспасөз қызметі Қылмыстық кодекстің 345-бабы 3-бөлігі бойынша тергеу басталғанын хабарлады. Бұл бап бойынша жүк көлігінің жүргізушісі 5 жылға дейін куәлігінен айырылып, 5 жылға темір торға қамалуы мүмкін.
Видеодан мопедтің жолдың дәл ортасында, екінші қатармен жүріп бара жатқанын байқауға болады. Оны сол сәтте бір қатардан екіншісіне ауысқан КАМАЗ қағады. Ауыр техниканың рөліндегі азамат мопедті байқамай қалған секілді. Жол ережесінің 24.4-тармағына сәйкес, мопед жүргізушілеріне тек оң жақтағы жолақпен жүруге рұқсат етілген. Демек Райымбек даңғылының бойында мопед автобус жолағымен жүруі керек еді.
Сондай-ақ бұл жерде КАМАЗ жүргізушісі де ереже бұзды. Өйткені жол ережесінің 9.4-тармағына сай, мұндай жолда (бір бағытта үш немесе одан да көп жолақ бар) оның сол жақ шеткі жолақпен жүруге құқығы жоқ.
Комментариев: 0