Денсаулық сақтау басқармасы Төле би мен Абылай хан қиылысында болған жол апатынан зардап шеккендерге қатысты мәлімет берді. Апаттан 21 адам жарақат алып, 37 жастағы азамат көз жұмған.
Сонымен қатар Төле бимен шығыс бағытта қозғалған 201-автобус, ал Абылай хан бойымен жоғары қарай жүріп бара жатқан 98 нөмірлі қоғамдық көлік екені белгілі болды. Біраз уақыт бұрын қиылыстағы бағдаршам жұмыс істемей тұрған деген ақпарат тарап еді, бірақ камера жазбалары мұны теріске шығарды.
Видеодан Абылай ханмен жүретін машиналарға бағдаршамның қызыл түсі жанғанын көруге болады. Төле бидегі көліктер қозғалысты бастауға дайындалып жатқан. 201-автобус қиылысқа жақындай бергенде, оң жақтан шыға келген 98-қоғамдық көлік қағады. Соққыдан екеуі де жаяу жүргіншілер өткеліне шығып кетті де, Астана алаңындағы шағын бақтағы ағаштарға соғылып барып, бір-ақ тоқтады.
№ 98 бағыттағы автобус жүргізушісінің ереже бұзуына не себеп болғаны анықталып жатыр. Ол сары түс жанып тұрғанда өтім үлгерем деді ме екен, әлде телефонға телміріп, жолды бақылаудан шығарып алды ма, әзірше өзіне ғана аян. Қылмыстық кодекстің 345-бабы, 3-бөлігі бойынша адам өліміне әкелген апатқа себеп болғаны үшін ол 5 жылға дейін түрмеге қамалып, сол мерзімге жүргізуші куәлігінен айырылуы мүмкін.
Комментариев: 0