2018 жылы Парижде әлем бойынша алғаш рет кикшеринг сервисі жаппай пайда болған. Алғашында бұл көлік түріне қызуғышылық жоғары болды, бірақ биыл тұрғындардың электросамокатқа қатынасы түбегейлі өзгерді. Бұған себеп — олардың қатысуымен болған жол апатының саны. 2022 жылдың қорытындысы бойынша самокаттың кесірінен Франция астанасында 459 адам зардап шегіп, оның үшеуі қайтыс болған.
The Guardian хабарлауынша, жергілікті билік тұрғындардың жалға берілетін самокаттарға көзқарасын білу мақсатында сауалнама жүргізген. Нәтижесінде халықтың басым бөлігі оған мүлде қарсы екені анықталды. Қандай аймақ екеніне байланысты 85.77-91.77 процент аралығындағы сандарды көрсеткен.
Қазір Париж көшелерінде Lime, Dott және Tier секілді бірнеше компания-оператор басқаратын 15 мың самокат қолданыста жүр.
Сауалнама нәтижесі қалада кикшеринг заңсыз дегенді білдірмейді. Билік тұрғындардың пікірі міндетті түрде ескерілетінін алға тартты. Алайда, Париж мэрі Анн Идальго халық электросамокат мінгендерден мезі болды, оған тыйым салу қоғамдық орындарда келеңсіз жағдайды азайтады деп мәлімдеді. 1 қыркүйекте қос дөңгелекті көлікті жалға беретін сервистер мен жергілікті билік арасындағы келісім мерзімі аяқталады. Сол күннен бастап олар жұмысын тоқтатуы мүмкін.
Француздардың кикшерингке қарсы шығуына себеп болған мәселелерді Алматы көшелерінен де күнде көріп жүрміз. Париж тұрғындарына жол ережесінің сақталмауы, бір самокатқа екі-үш адам мініп алуы және техниканы арнайы орындарға қоймай, кейде Сена өзеніне лақтыруы ұнамайды.
Комментариев: 0