«Алматы облысындағы жол-көлік жағдайы біршама жақсарды. Жыл басынан бері облыс аумағында 659 ЖКО тіркелді, одан 106 адам қаза тауып, 937 адам жарақат алған. Өткен жылмен салыстырғанда, жолдағы апат саны 30 %-ға қысқарды», — деп мәлімдеді мекеменің баспасөз қызметі.
Бірақ ҚР БП Құқықтық статистика және арнайы есепке алу жөніндегі комитетінің сараптамасына үңілсек, Алматы облысының тас жолдағы өлім саны бойынша алғашқы орында тұрғанын байқаймыз. Ал апат саны жағынан Алматы көш бастап тұр. Оңтүстік астанада болған 950 жол көлік оқиғасынан 1 141 адам зардап шеккен. Алып қаладағы көлік санының көптігін ескерсек, бұл таңғалатын дүние емес. Десе де, соңғы бес айда мегаполисте жол апатынан небәрі 31 адам көз жұмды.
Жол апатынан қаза тапқандар саны бойынша екінші орында тұрған Түркістан облысында бес айда 350 ЖКО болып, 82 адам бақилық болды. Ал үшінші орында Қарағанды (42) және Жамбыл (40) облыстары тұр.
Павлодар (11), Солтүстік Қазақстан (12) облыстары мен Нұр-Сұлтан (12) тізім соңына орналасты.
Алматы және Түркістан облыстарының адам өлімімен аяқталған жол апаттары бойынша бірнеше жылдан бері иық тірестіріп келе жатқанын айта кеткен жөн. Сараптама көрсеткендей, бұған көлік жүргізу мәдениетінің төмендігі, машинаның көптігі және елді мекендер арасының алшақтығы себеп болып отыр.
Комментариев: 0