Жол апаты бүгін таңғы алты шамасында Алматы облысындағы Боралдай — ЖЭО-2 аралығында болды. ҚТЖ баспасөз қызметі хабарлағандай, ВАЗ-2107 жүргізушісі 35 вагоны бар локомотивке жол бермей, теміржолға шығып кеткен. Машинист тежеуішті шұғыл басқанымен, тоқтап үлгермеді.
Соқтығысқаннан кейін пойыз тоқтап, өткелді жауып қалған. Сөйтіп жолда ұзақ-сонар кептеліс болды.
Қолы сынған ВАЗ-2107 жолаушысы ауруханаға жеткізілді. Жүргізуші зардап шеккен жоқ. Теміржол қызметкерлері қазір оқиға болған жерде жол ашылып, машиналар жүріп жатқанын айтты.
Облыстық полиция департаментінің баспасөз қызметі ВАЗ-2107 рөлінде 32 жастағы жергілікті тұрғын отырғанын хабарлады. Ол жол ережесін елемей өткелден өтіп, пойыздың жолын кескен. Апат салдарынан жеңіл көлікте отырған әйел басынан жарақат алған және қолы сыныпты. Дәрігерлер көмек көрсеткен соң ол амбулаторияда ем алады.
Полицейлердің айтуынша жолаушы жүргізушінің келіншегі екен, ол жарақат алса да, күйеніі атына арыз жазған жоқ. Сондықтан ер адам тек Әкімшілік кодекстің 610-бабы, 1-бөлігі ( көлiк жүргiзушiлерінiң көлiк құралдары, жүктер, жолдар, жолдағы және басқа да құрылысжайлар немесе өзге мүлiктiң бүлінуіне алып келген, материалдық залал келтiрген жол жүрісі қағидаларын бұзуы) бойынша жауапқа тартылады. Істі әкімшілік сот қарайды. Тұрғын 20 АЕК көлемінде айыппұл арқалауы немесе 6 айға дейін көлік жүргізу құқығынан айырылуы мүмкін.
Комментариев: 0