Мегаполис әкімі Бақытжан Сағынтаевтың айтуынша, пайдаланылған газдар — қаладағы ауаның ластануына бірден бір себепкер дүниелердің бірі. Мәселені ең болмаса бастапқы кезеңінде шешуге қоғамдық көліктің газ бен электр қуатына өтуі көмектеседі.
«Соңғы уақытта автобус паркі қарқынды жаңартылуда. Біз дизельді отынмен жүретін автобустарды сатып алдық. Сатып алынған көліктер жүре берсін, бірақ енді ешқандай дизельді көлік алмаймыз, тек газбен қозғалатын қоғамдық көліктер не электробустар сатып алынады», — деп мәлімдеді қала басшысы.
Әкім газды және электрлі көлік өндірушілермен келіссөздер жүргізіліп жатқанын атап өтті. Алайда қала болашақта троллейбустардан бас тартатын сыңайлы.
«Біздің троллейбустар өте жақсы, троллейбус автопаркі де жақсы жұмыс істеуде. Бірақ өкінішке орай, троллейбустардың жартысы тұралап тұр, себебі олардың өздері де, желілері де тозған. Қазір ақша бөлдік, троллейбустармен байланысты электр желілерін жаңартуды бастаймыз. Содан кейін біз келешекте троллейбустарды дамытамыз ба, әлде электробустарды дамытамыз ба деген мәселені талқыға саламыз. Мүмкін желіге ақша жұмсағанша, бірден электрлі автобус алған дұрыс болар? Бізде осындай түсінік қалыптасты», — деді Б. Сағынтаев.
Осы орайда, дизельді автобустардың Алматының ауасын ластап жатқаны туралы биліктің алғаш кеңестік кезеңде сөз қылғанын айта кеткен жөн. 90 жылдары автопарктер қолға түскеннің бәрін сатып ала берген. Есімов әкім болып тұрған шақта газбен жүретін «ютонгтар» пайда болды. Бірақ Байбек билікке келгенде дизельді көлік біртіндеп қала көшелеріне шыға бастады. Оның үстіне мұндай көліктердің біразын қала әкімдігі сатып алған болатын.
Енді мегаполис басшылығы Алматының дизельден бас тартатынына сенімді. Жақсы! Бірақ троллейбус желілерін жаңарту да көп қаражатты талап етеді. Бұл алдыңғы басшының шешімімен қаланы трамвайдан арылтқан жағдайды еске түсірмей ме? Айтпақшы, президент трамвайлардың жойылуын екіұшты шешім деді.
Анықтама ретінде: қазіргі таңда троллейбустардан толық бас тартып, орнына электробусты қолданысқа енгізумен Мәскеу билігі айналысып жатыр. Алайда электрлі тартымға ие көліктер сенімсіз, бағасы қымбат әрі ұзақ зарядталады. Оның үстіне, олардың пеші дәл сол дизельмен жұмыс істейді. Десе де, қала билігі мәскеуліктерді электрлі автобусқа отырғызбақ ниетте.
Комментариев: 0