Бір жыл ішінде жол мамандары 6.2 шақырым радиалды көлік магистралін жүргізуді аяқтайды. Оның үш шақырымы Абай даңғылы, ал қалған 3.2 шақырымы — Саин көшесі. Сонымен қатар қыркүйекте Наурызбай ауданындағы аудандық маңызға ие жолдың да екі шақырымы салынады.
Kolesa.kz тілшісіне қалалық мобильділік басқармасының мамандары хабарлағандай, мегаполисте кіші айналма жол салу барысында үш жолайрықтың құрылысы жалғасады. Рысқұлов — Емцов қиылысындағы жолайрық — жыл соңында, Сейфуллин мен Жансүгіров арасындағы жолайрық — 2022 жылғы желтоқсанда, ал әуежай маңындағы жолайрық 2022 жылғы ақпанда қолданысқа берілуі тиіс.
Оған қоса шенділер жыл соңына дейін Жандосов көшесінің Сүлейменовтен Тілендиевке дейінгі бөлігін қалпына келтіріп, Таусамалы шағынауданында орналасқан Алматинская көшесінің Рысқұлов пен Яссауи аралығындағы бөлігі жөнделетінін айтты.
Төле би көшесі Яссауиден Алтын Орда көшесіне дейін батысқа қарай ұзартылады. Жаңа жолдың төрт шақырымы алты жолақты болады.
Назарбаев даңғылын оңтүстік бағытта ұзарту жобасын жол мамандары 2021 жылғы маусымға дейін әзірлеуі қажет. Содан соң ондағы жер телімдері сатып алынып, жол салына бастайды. Алдын ала деректерге сүйенсек, ол төрт жолақты болады, Достықпен қиылысына бағдаршам орнатылады.
Саин көшесін солтүстік бағытта ұзарту жұмысы басталып кетті. Қазір онда жұмыс қызу жүріп жатыр. Жаңа жол биыл желтоқсанда қолданысқа берілуі тиіс, дегенмен істің мерзімді аяқталуы жер телімдерінің жылдам алынуы мен қала бюджетіндегі ақшаға байланысты.
Рысқұлов даңғылын Оңғарсынова көшесінен қала шекарасына дейін батыс бағытта ұзарту жоспарда бар. Қазір тиісті құжаттар әзірленіп жатыр. Әкімдік нақты схема Алматының бас жоспары түзетілген соң дайын болатынын хабарлады.
Комментариев: 0