Алматы әкімдігі Саин көшесіндегі арнайы жолақты алып тастайды

Саин көшесіне мамандар пилоттық режимде автобус жолағын сызған, әкімдік жобаның сынақ мерзімі аяқталғанын хабарлады. Шенділердің айтуынша биыл 31 тамызда пилоттық формат келесі кезеңге — транспорт желісінің басқа учаскелерін және кешенді схеманы іске асыру үшін қажет нормативтерді әзірлеу сатысына өтеді, соған орай арнайы жолақ күшін жояды. Бірақ жол таңбасын түбегейлі өшіре ме, жоқ па, белгісіз.

Автобус жолағы биыл 20 маусымда пилоттық режимде іске қосылған. Жол қызметкерлері хабарлағандай, жолақ қарбалас уақытта тиімді екенін көрсеткен. Таңертең көшедегі қоғамдық көлік жылдамдығы 26.2-ден 31.8 км/сағ-қа (21.37%), кешке 25-тен 30.4 км/сағ-қа (21.6%) дейін артыпты. Автобус пен троллейбус қозғалысының орташа интервалы жалпы уақытта — 13.6-дан 12 минутқа (12%), таңғы қарбалас шақта 13.6-дан 11.6 минутқа (14.7%) қысқарған. Ал жолаушылар легі тәулігіне 42 396-дан 44 515 адамға (5%) көбейген.

1 / 4

• 
• 
• 
• 

1 / 4

Әкімдік біраз уақыттан кейін Саин көшесіндегі таңба қоғамдық көлікке арналған үлкен жол шеңберінің бір бөлігі ретінде қайта пайда болатынын хабарлады. Өзара жалғасып жататын арнайы жолақ Әл-Фараби даңғылы, Саин көшесі, Рысқұлов даңғылы және Шығыс айналма жолы бойымен өтеді. Оны жұмысшылар жол қозғалысын ұйымдастыру саласындағы стандарт пен бірқатар нормативтік-құқықтық актіні өзгерткен соң кезең-кезеңімен сызады.

Алматы билігі Саин мен Әл-Фараби бойына монорельсті жол салуды да жоспарлап отыр.