Әлемдегі ең қымбат ақылы жол қай елде?

Австралияның Budget Direct басылымы әлемдегі ең қымбат ақылы жолдар тізімін жасады. Ондыққа төмендегі жолдар енді:

1. Пенсильвания Тёрнпайк автомагистралі, АҚШ ($112.9).
2. Гросглокнер биік Альпі жолы, Австрия (€37.50).
3. Риека — Загреб/Сплит — Дубровник бағыты, Хорватия (€31.72).
4. Конфедерация көпірі, Канада ($37.75).
5. Загреб — Дубровник автомагистралі, Хорватия (€30.66).
6. Гран-Сан-Бернар туннелі, Швейцария (€28.95).
7. M1/E30 тас жолы, Беларусь (€24.36).
8. Нью-Йорк штатының автомагистраль желісі, АҚШ ($28.05).
9. Флорида Тёрнпайк автомагистралі, АҚШ ($26.45).
10. A2 Светска-Конин автожолы, Польша (€18.53).

Ақылы жолдардың бағасы бағыттың ұзындығы, күрделілігі секілді бірнеше себептерге байланысты болады. Мәселен, бүкіл штатты қамтитын Пенсильваниядағы Тёрнпайк 580 шақырымға созылып жатыр. Сол үшін де қымбат жолдар рейтингінде көш бастап тұр. Ал Беларусь еліндегі M1/ E30 магистралінің ұзындығы — жарты мың шақырым.

Зерттеу жүргізген авторлардың мәліметінше, ақылы жолдар көп елдегі орташа жол жүру ақысы ондай жолдар аз елдермен салыстырғанда төмен болады.

Қазақстан бұл тізімге енген жоқ. Біздің елдегі ең қымбат ақылы жол — Алматыдан Қорғасқа дейінгі тас жол. Бағасы: қолма-қол төлесеңіз 600, алдын-ала төлесеңіз 300 теңге. Ал ұзындығы 211,5 шақырым болатын Нұр-Сұлтан — Щучинск жолында жүру үшін қолма-қол 400 теңге немесе алдын-ала 200 теңге жұмсайсыз. Алматы — Қапшағай бағытындағы жол бұдан екі есе арзан.

Бүгінде елімізде үш ақылы жол бар. Биыл оған тағы 13-і қосылады. 2024 жылдың аяғына дейін 11 мың шақырым автомобиль жолы ақылы болады. Kolesa.kz мобильді қосымшасы арқылы ақылы жолдарға 50% жеңілдікпен жылдам төлем жасауға болады.