Әлемде ең көп өткен үш көліктің екеуі — Toyota, біреуі — Tesla

JATO Dynamics хабарлағандай, 2022 жылы әлемде 79.4 млн жаңа машина иесін тапты, бұл бір жыл бұрынғыдан 2 % аз. Мұның 69 %-ы Солтүстік Америка, Еуропа және Қытайда сатылды. Бірақ олардың саудадағы жалпы үлесі азайды, оған компонент тапшылығы мен Ресей нарығының құлдырауы (—59 % немесе миллионға жуық машина) себеп болды.

Дамушы елдер арасында Үндістан үздік нәтиже көрсетіп, 4.37 млн автомобиль (+24 %) саудалады. Осылайша ол Жапонияны басып озып, әлемдегі үшінші ірі автонарыққа айналды. Үндістанның көрсеткіші бұдан да жақсаруы мүмкін, өйткені былтыр 1000 адамға шаққанда 3.1 көлік қана өткен, бұл 25 ірі автонарық арасындағы ең төмен көрсеткіш.

Ал автоөндірушілер рейтингінде үлкен өзгеріс жоқ. Үздік үштікке Toyota, Volkswagen Group және Hyundai-Kia енді. Төртінші және бесінші орынға Stellantis пен General Motors жайғасқан. Электромобиль нарығында Tesla мен қытайлық BYD көш бастап тұр.

Әлемдегі ең танымал модельдер тізіміне Toyota RAV4 (млн данадан көп өтті), Corolla (992 мың) және Tesla Model Y (747 мың) енді. Электромобильдер арасында мұндай үздік нәтижеге алғаш рет қол жеткізген Model Y Қытайда (44 %), Солтүстік Америкада (34 %) және Еуропада (19 %) жақсы өтті.