8 мамырдан бастап жол ақысын кешіктіріп төлеуге болады

ҚР ИИДМ жалпыға ортақ республикалық маңызы бар ақылы автожолда (жол бөлігі) жүргені үшін ақы алу қағидасына өзгеріс енгізді. Құжат жарияланды, биыл 8 мамырда күшіне енеді. Сол күннен бастап жүргізушілер жол ақысын мынадай тәсілмен төлейді:

• Төлем жүйесі қызметін пайдаланып, алдын ала төлем жасау.
• Ақылы жолдан шыққан соң жеті күннен кешіктірмей төлем жасау.
• Ақы алу бекеті бар болса, сонда төлем жасау.

Жол ақысын төлемеген жүргізуші Әкімшілік кодекстің 628-бабына сай айыппұл арқалайды: жеке тұлға — 5 АЕК (2023 жылы 17 250 теңге), заңды тұлға — 10 АЕК (34 500 теңге). Ақы алу бекетіне (бар болса) RFID-таңбасы және мемлекеттік нөмірі жоқ машина келсе, жүргізуші қанша километр жол жүргеніне қарамастан, тұтас ақылы жолға ақша төлейді.

RFID-таңба заңды әрі ережеге енген төлем жасау жүйесі. Оны бастапқыда тегін орнатады, егер жапсырма бүлінсе немесе нөмір ауыстырсаңыз, ақша төлеп қайта жасатасыз. Таңбаны алып тастауға, өзге адамға беруге немесе басқа көлікке орнатуға болмайды.

RFID-таңба (Radio Frequency Identification) — көлік құралын қосымша сәйкестендіру үшін қолданылатын, ақы алу жүйесіне енген жеке нөмірі бар радио жиілікті электронды қағаз құрылғы. Ол ашылса немесе алып тастаған жағдайда өзін-өзі жою функциясына ие.

Ақылы жолға іргелес аудандарда тұратын көлік иелері абонемент сатып алса болады, мұндай «жол жүру билеті» бір ай немесе бір жылға беріледі. Егер облыста бірнеше ақылы жол болса, әр трассаға жеке абонемент алу қажет. Сондай-ақ ережеде ақылы жолмен тегін жүре алатын азаматтар категориясы жазылған.