460 000 000 теңге тұратын Lexus LFA

2010–2012 жылдары Айти префектурасындағы Toyota зауыты шығарған екі есікті Lexus LFA моделін өте сирек кездесетін машина деуге болады. Оның небәрі 500 экземпляры жарық көрген, мұндай көлік жолда көп кездеспейді. Бірақ 2012 жылғы бір LFA қазір Kolesa.kz-те саудаланып жатыр.

Сатушы ақ түсті купенің жағдайы мінсіз, қосымша шығынды қажет етпейді деп жазыпты. Одометрі небәрі 14.5 мың км көрсетіп тұр. Яғни, оны әлі жаңа деуге болады.

Автомобиль 4.8 литрлік 1LR-GUE индексті V10 моторымен жүреді. Toyota инженерлері Yamaha мамандарымен бірге әзірлеген бұл қозғалтқыш 560 ат күші мен 480 Нм береді. Айналу моменті 6 сатылы Aisin робот қорабы арқылы артқы дөңгелектерге беріледі. Салмағы 1.58 тонна суперкар алғашқы жүздікті 4 секундқа жетпейтін уақытта еңсереді, ал ең жоғары жылдамдығы — 325 км/сағ.

Lexus LFA Алматыда, құны өте жоғары. Иесі машинаны 460 000 000 теңгеге (977 мың доллар) бағалап отыр.